Ulttyq olımpıada komıtetiniń jańa quramyna kimder kirdi
ASTANA. KAZINFORM – Búgin Qazaqstan Ulttyq olımpıada komıtetiniń bas assambleıasy otyrysy ótip, onyń barysynda uıymda birqatar kadrlyq aýys-túıis boldy. Atap aıtqanda, uıym músheleriniń qoldaýymen komıtet prezıdenti laýazymyna dańqty boksshy Gennadıı Golovkın saılandy. Sonymen qatar UOK-tyń birqatar laýazymdy tulǵasy da saılanǵan edi.
Assambleıanyń kezekten tys otyrysynda jasóspirimder quramasynyń 2024 jylǵy Ońtústik Koreıada ótken IV qysqy Jasóspirimder Olımpıadasyndaǵy nátıjesi qorytyndylanyp, shilde aıynda Parıjde ótetin jazǵy Olımpıada oıyndaryna daıyndyǵy talqylandy.
Bas assambleıa músheleriniń daýys berý qorytyndysynda Ulttyq olımpıada komıtetiniń prezıdenti laýazymyna Gennadıı Golovkın saılandy.
«Jańa laýazymda elimizdiń atynan áreket etý - men úshin zor mártebe. Maǵan Qazaqstan Ulttyq olımpıada komıtetin basqarýdy aıtqanda Qazaqstan sportyn damytýǵa óz úlesimdi qosýǵa múmkindik berse ǵana, kandıdatýramdy usynatynymdy aıttym. Ózderińiz biletindeı, men saıasatker de, sheneýnik te emespin. Óz áreketimdi sózben emes, ispen dáleldep úırengenmin. Bizdiń aldymyzda turǵan eń mańyzdy mindetterdiń biri halyqaralyq qarym-qatynasty retteý dep bilemin. Osy oraıda, meniń óz kózqarasym, jyldar boıy jınalǵan halyqaralyq tájirıbem baryn, komanda baryn aıtqym keledi. Al eń bastysy jáne meniń kópten bergi qalaýym – bul barlyǵyn da ózimniń týǵan elimde júzege asyrý», - dedi jıynda sóz alǵan Gennadıı Golovkın.
Ol 1982 jyldyń 28 aqpanynda Qaraǵandy qalasynda dúnıege kelgen. Ol áýesqoı boksta 350 jekpe-jek ótkizip, onyń 345-inde jeńiske jetti. Esh ýaqytta nokaýt turmaq nokdaýnǵa da túsip kórgen joq. Gennadıı áýesqoı boksta Azııa, Álem chempıonattarynda top jardy. Alaıda, Olımpıada chempıony bola almady, kúmis medaldi qanaǵat tutty. WBA nusqasy boıynsha ortasha salmaqta álem chempıony ataǵyn 8 márte, IBO nusqasy boıynsha ortasha salmaqta álem chempıony ataǵyn 5 ret qorǵady. Kásipqoı boks tarıhynda ortasha salmaq boıynsha nokaýt boıynsha 89 paıyzdyq úlespen birinshi orynǵa da shyqty.
Ulttyq olımpıada komıtetiniń qysqy sport túrleri boıynsha vıtse-prezıdenti – Mamın Asqar Uzaqbaıuly.
Ol 1965 jyly 23 qazanda qazirgi Astana qalasynda dúnıege kelgen. Ár jyldary Astana qalasynyń ákimi, Kólik jáne kommýnıkatsııalar mınıstri, Premer-Mınıstrdiń orynbasary, Úkimet basshysy bolǵan.
Ulttyq olımpıada komıtetiniń jazǵy sport túrleri boıynsha vıtse-prezıdenti – Ábilǵazın Danııar Rústemuly. 1969 jyly Almaty qalasynda dúnıege kelgen. Ol – Qazaqstannyń Sý sporty túrleri federatsııasynyń prezıdenti, Ústel tennısi federatsııasynyń prezıdenti, Sporttyq jekpe-jek jáne kúsh qoldanylatyn sport túrleri konfederatsııasynyń tóraǵasy, «Almaty Triathlon Federation» QB qamqorshylyq keńesiniń, «Fizmat Endowment Fund» qamqorshylyq keńesiniń tóraǵasy.
Ulttyq olımpıada komıtetiniń jalpy máseleler boıynsha vıtse-prezıdenti – Myrzabosynov Erbol Qýantaıuly.
Ol 1984 jyly Shyǵys Qazaqstan oblysynda dúnıege kelgen. Semeı pedagogıkalyq ıstıtýtyn, Qazaq gýmanıtarlyq-zań ınnovatsııalyq ýnıversıtetin, Qazaq sport jáne týrızm akademııasyn bitirgen. 2020-2021 jyldary Qazaq kuresi qaýymdastyǵynyń basqarýshy dırektory, 2021-2023 jyldary Dene tárbıes jáne buqaralyq sport akademııasynyń rektory bolǵan. 2023 jyldan beri Mádenıet jáne sport mınıstrligi Sport isteri jáne dene tárbıesi komıtetiniń tóraǵasy qyzmetin atqarady.
Ulttyq olımpıada komıtetiniń paraolımpıadalyq sport túrleri boıynsha vıtse-prezıdenti – Sápıev Serik Jumanǵalıuly.
1983 jyly 16 qarashada Qaraǵandy oblysynda dúnıege kelgen. Mádenıet jáne sport mınıstrligi Sport isteri jáne dene tárbıesi komıtetiniń tóraǵasy qyzmetin atqarǵan. 2005 jáne 2007 jyldary bokstan álem chempıony, 2012 jyly Olımpıada chempıony bolǵan. Qazaqstannyń eńbek sińirgen sport sheberi, eńbek sińirgen sport qaıratkeri, Vel Barker kýbogynyń ıegeri.
Ulttyq olımpıada komıtetiniń bas hatshysy – Ótesheva Janar Azyrqanqyzy.
Ol sońǵy 2 jyl boıy Gennadıı Golovkın komandasynyń BAQ-pen jumys máselelerimen aınalysyp keldi.
Sporttyń olımpıadalyq túrleri boıynsha ulttyq federatsııa ókilderi Ulttyq olımpıada komıteti Atqarýshy komıtetiniń de múshesi boldy, olar:
Balandın Dmıtrıı Igorevıch 1995 jyly 4 sáýirde Almaty qalasynda dúnıege kelgen. 200 metrge brass ádisimen júzýden 2016 jylǵy jazǵy Olımpıada oıyndarynyń chempıony, Azııa oıyndarynyń úsh dúrkin chempıony, 2015 jyly ótken Ýnıversıada jeńimpazy;
Súleımenov Dıas Tóleýtaıuly 1972 jyly 27 shildede Temirtaý qalasynda dúnıege kelgen. «Qamqor Menedjment» JShS-niń bas dırektory, Qazaqstan Ulttyq shańǵy qaýymdastyǵynyń prızıdenti, Ulttyq paralımpıadalyq komıtettiń vıtse-prezıdenti;
Ótemuratov Bolat Jamıtuly 1957 jyly 13 qarashada Atyraý qalasynda dúnıege kelgen. Qazaqstan Tennıs federatsııasynyń prezıdenti, Halyqaralyq tennıs federatsııasynyń vıtse-prezıdenti (International Tennis Federation);
ıÝsýpova Álııa Maqsutqyzy 1984 jyly 15 mamyrda Shymkent qalasynda dúnıege kelgen. Qazaqstan sportshysy. Kórkem gımnastıkadan Afına men Beıjiń Olımpıadalaryna qatysqan;
Esekeev Qýanyshbek Baqytbekuly 1975 jyly 10 maýsymda Almaty qalasynda dúnıege kelgen. «Qazaqtelekom» AQ basqarmasynyń tóraǵasy jáne Dırektorlar keńesiniń múshesi;
Gadjıev Gadjı Shapıevıch 1974 jyly 29 qyrkúıekte dúnıege kelgen. Bıznesmen, qoǵam qaıratkeri. Aýyr atletıka federatsııasynyń birinshi vıtse-prezıdenti, QR Penchak sılat qaýymdastyǵynyń prezıdenti;
Ahmetov Danıal Kenjetaıuly 1954 jyly 15 maýsymda Pavlodar qalasynda dúnıege kelgen. Shyǵys Qazaqstan oblysynyń ákimi, Qorǵanys mınıstri, Premer-Mınıstr, Eýrazııalyq ekonomıkalyq komıssııanyń energetıka jáne ınfraqurylym jónindegi alqasynyń múshesi (mınıstr) bolǵan;
Qazaqstan Ulttyq olımpıada komıteti Tekserý komıssııasynyń tóraǵasy laýazymyna Alpamysov Abaı Ábdimásetuly saılandy.
Ol 1969 jyly 11 maýsymda dúnıege kelgen. Qazaqstan Ulttyq basketbol federatsııasynyń bas hatshysy, prezıdenti, Qyzylorda oblysy ákiminiń orynbasary qyzmetterin atqarǵan.
Qazaqstan Ulttyq olımpıada komıteti Tekserý komıssııasynyń múshesi bolǵandar:
Áshimbekov Rabbanı Ábdikamaluly – Qazaqstannyń gımnastıka federatsıfsynyń bas hatshysy.
Serikov Rollan Serikuly – Týrızm jáne sport mınıstrliginiń Sport isteri jáne dene tárbıesi komıteti tóraǵasynyń orynbasary.
Sportshylardyń, sportshylar saılaǵan komıssııanyń ókili bolyp Rypakova Olga Sergeevna saılandy.
Ol 1984 jyly 30 qarashada Óskemen qalasynda dúnıege kelgen. Jeńil atlet. Ol 2012 jyly London Olımpıadasynda altyn, Beıjiń Olımpıadasynda kúmis jáne Rıe-de-Janeıro Olımpıadasyna qola medal jeńip alǵan.
Ulttyq Olımpıada komıteti 1990 jyldyń 3 aqpanynda qurylyp, 1993 jyldyń qyrkúıek aıynda Halyqaralyq Olımpıada komıteti tarapynan resmı túrde tanylǵan. Ol derbes, táýelsiz qoǵamdyq uıym sanalady. Óz qyzmetin júzege asyrý barysynda Olımpıada hartııasy, Qazaqstan Respýblıkasy Zańdary jáne UOK Jarǵysyn negizge alady. UOK mıssııasy – Qazaqstan aýmaǵynda olımpıadalyq qozǵalysty damytý jáne ony qorǵaý, Olımpıadalyq qundylyqtardy nasıhattaý.
