Aqtóbede sý tasqyny kezinde qırap qalǵan úılerdi buzýǵa 250 mln teńge jumsalady

AQTÓBE. KAZINFORM – Aqtóbe qalasynda sý tasqyny kezinde 191 úı apatty dep tanyldy. Bıyl úılerdi súrýge bıýdjtten qarjy bólinedi.

Ashyq NQA portalynda «2025-2027 jyldarǵa arnalǵan Aqtóbe qalasynyń bıýdjetin bekitý týraly» Aqtóbe qalasy máslıhatynyń sheshimine ózgerister engizý jobasy jarııalandy. Onda 19 mlrd teńgeni qaıta bólý jobasy usynyldy.

Portaldaǵy aqparatqa súıensek, sý tasqynynan zardap shekken 191 turǵyn úıdi buzý úshin aldymen jobalyq-smetalyq qujat ázirlenedi. Keıin súrip, qoqys polıgonyna jetkizýge 250 mln teńge jumsalady. Qırap qalǵan úıdiń bári Aqtóbe qalasy Almaty aýdanynda ornalasqan. 

Aıta keteıik, Aqtóbe qalasynyń bıýdjeti bıyl 144 mln teńge bolyp tur. Qaladaǵy Almaty jáne Astana aýdandarynda stıhııalyq qoqysty jınap, shyǵarýǵa 250 mln teńge bólinetin boldy.

Al shaǵyn arhıtektýralyq músinderdi ornatýǵa 308 mln teńge jumsalady. Byltyr jyl sońynda qalada «qaǵaz ushaq» ornatylyp, kópshilik synyna ushyraǵan bolatyn.