Ulttyq quryltaı aıryqsha ról atqaryp keledi – Prezıdent

QYZYLORDA. KAZINFORM – Ulttyq quryltaıda aıtylǵan usynystardyń negizinde 26 zań qabyldandy. Bul týraly Memleket basshysy Qasym-Jomart Toqaev Qyzylorda qalasynda ótip jatqan Ulttyq quryltaıdyń V otyrysynda aıtty.

- Osy rette, Ulttyq quryltaı aıryqsha ról atqarǵany sózsiz. Tórt jylda quryltaı músheleri el ómirine yqpal etetin kóptegen mańyzdy bastama kóterdi. Ulttyq quryltaıda aıtylǵan usynystardyń negizinde 26 zań qabyldandy. Osynyń ózi Quryltaı aýqymdy reformalardyń negizgi qozǵaýshy kúshi bolǵanyn aıqyn kórsetedi. Áıelderdiń quqyǵy men balalardyń qaýipsizdigin qamtamasyz etý úshin naqty qadamdar jasaldy. Lýdomanııaǵa, ıaǵnı oıynqumarlyqqa jáne nashaqorlyqqa qarsy belsendi kúres júrgizile bastady. Onomastıka salasyndaǵy jumystar retke keltirildi. Memlekettik nagradalar júıesine jańadan qurmetti ataqtar engizildi. Sol arqyly eńbek adamdarynyń mártebesi arta tústi, - dedi Qasym-Jomart Toqaev.

Budan bólek Prezıdent ulttyń jańa sapasyn qalyptastyratyn basty qundylyqtar aıqyndalǵanyn atap ótti.

- Urpaqtyń bolashaǵyna zııanyn tıgizetin keselderge barynsha tosqaýyl qoıatyn boldyq. Quryltaı músheleri ótken jylǵy jıynda ishki saıasat salasyn retke keltirý týraly bastama kóterdi. Tıisti qujatty ázirleýge ózderińiz belsene atsalystyńyzdar. Byltyr Qazaqstan Respýblıkasy ishki saıasatynyń negizgi qaǵıdattary, qundylyqtary men baǵyttary bekitildi. Endi, osy qujatty basymdyq retinde qarap, belsendi túrde iske asyrýymyz kerek, - dedi Memleket basshysy.

Osyǵan deıin V Ulttyq quryltaıdyń alǵashqy kúninde 200-den astam usynys aıtylǵany týraly jazdyq.