Ulttyq kıimdi ulyqtaǵan úzdik mektep
ASTANA. KAZINFORM – Ulttyq kıimdi ulyqtap júrgen bilim ordalarynyń biri – Astana qalasyndaǵy Sheıh Támım ben Hamad ál-Tánı atyndaǵy № 85 mektep-lıtseıi. Mektep tabaldyryǵynan attaı bere qazaqylyqtyń ısi ańqyp, rýhyń asqaqtaı túsedi.
Buǵan deıin mektep ujymy Áz-Naýryz qarsańynda ulttyq kıimdi kııýdi qolǵa ala bastasa, bıyl qyrkúıek aıynan bastap joǵary synyp oqýshylary aptasyna kem degende bir márte kıip júrýdi dástúrge aınaldyrǵan.
Al bastaýysh synyp oqýshylary sabaqqa kúndelikti ulttyq kıimmen kelip júr.
Bul ıgi dástúrdi ata-analar jappaı qoldap, oqýshylar ulttyq oıýlar beınelengen birkelki mektep formasyn qalyptastyryp úlgergen.
Tipti, mektep formasynan bólek qyzdar sholpy taǵyp, uldar basyna taqııa kıip, mekteptiń sánin keltirýde.
1 «á» synyp oqýshysy Aısha Aıetova ár tańda anasy shashyn órip, sholpy, shekelik taǵyp beretinin aıtady.
«Buryn qýyrshaqpen oınaǵan kezde shashyn órip, sholpy taǵýǵa qyzyǵatyn edim. Bıyl mektep tabaldyryǵyn attap, sabaqqa shekelik, sholpy taǵyp kelip júrmin. Taqpasam, birdeńe jetpeıtindeı kóńilsiz otyramyn», - deıdi Aısha.
Basyna taqııasyn qondyrǵan Beıbarys Tursyndy synyptastary «Taqııaly perishte» dep te ataıtyn kórinedi.
«Óskende áskerı qyzmetshi bolǵym keledi. Atam taqııanyń qasıeti jaıly jıi aıtady. Sol sebepti mektepte de, qonaqqa barǵanda da kıip júremin», - deıdi ol.
Bastaýysh páni muǵalimi Ásem Janataeva da sabaqqa ulttyq kıimmen kelip, oqýshylarǵa ulttyq qundylyqtardy nasıhattaýǵa úles qosyp júr.
Mektepte sán-saltanaty kelisken kıiz úı bar eken. Onda sabaq berý muǵalimge de, oqýshylarǵa da qyzyqty.
Al, ulttyq oıyndar ortalyǵynda oqýshylar toǵyzqumalaq, asyq oınap, ulttyq sport oıyndaryna degen qyzyǵýshylyqtary artýda.
Bastaýysh páni muǵalimi Aıgúl Kenjına ulttyq kıim kıip júrgen balalardyń patrıot bolyp ósetinine senimdi.
«Qazaq halqynyń ulttyq kıimi ózge ulttardan ózgeshe. Sebebi, ata-babamyz tabıǵat aıasynda erkin ǵumyr keshýimen baılanysty der edim. Sońǵy ýaqytta túrli oıýlarmen kómkerilgen zamanaýı ulttyq kıimder paıda boldy. Bul rette, ata-analar ulttyq element beınelengen mektep formasyna tapsyrys berip, oqýshylarymyz sup-sulý bolyp sabaqqa kelip júr», - deıdi A.Kenjına.
Mektep ustazdary da ulttyq kıim kıip, sabaq barysynda oqýshylarǵa salt-dástúr jaıly qysqa aqparat berip otyrýdy ádetke aınaldyrǵan.
Aıta keteıik, Sheıh Támım ben Hamad ál-Tánı atyndaǵy № 85 mektep-lıtseıi 2018 jyly 5 qyrkúıekte ashylǵan. Qazirgi tańda munda 3044 oqýshy bilim alýda.
