Ulttyq ǵylym akademııasy taratylady
ALMATY. KAZINFORM — Bul sheshim keshe akademıkterdiń jalpy jınalysynda qabyldandy. Akademııa respýblıkalyq qoǵamdyq birlestik retinde jumys istep keldi jáne QR Prezıdenti janyndaǵy taǵy bir osyndaı uıymmen qatar qyzmet atqardy. Bul týraly Ulttyq ǵylym akademııasynyń baspasóz qyzmeti habarlady.
27 naýryzda Almaty qalasynda 2003 jyly qoǵamdyq uıym retinde qurylǵan «Qazaqstan Respýblıkasynyń Ulttyq ǵylym akademııasy» respýblıkalyq qoǵamdyq birlestiginiń jalpy jınalysy ótti.
— Jıyn barysynda biraýyzdan UǴA RQB akademıkterin Prezıdent janyndaǵy QR UǴA (Joǵary ǵylymı uıym) quramyna transformatsııalaý «QR UǴA» respýblıkalyq qoǵamdyq birlestigin uıym Jarǵysynda kórsetilgen barlyq talapty saqtaı otyryp erikti túrde taratýǵa qatysty tarıhı sheshim qabyldandy. Jalpy jınalysqa qatysqan akademıkter eldiń ǵylymı áleýetin bir ortalyqqa shoǵyrlandyrýdy kózdegen azamattyq ustanymǵa qoldaý bildirdi. Bul sheshim Prezıdent janyndaǵy Ulttyq ǵylym akademııasynyń qyzmetine uqsas fýnktsııalardyń qaıtalanýyn boldyrmaı, ony jańa formattaǵy biregeı ári ornyqty ǵylymı ortalyq retinde eki akademııa ǵalymdarynyń ǵylymı potentsııalyn biriktirip nyǵaıtýǵa múmkindik beredi, — delingen habarlamada.
Eske sala keteıik, Prezıdent janyndaǵy Ulttyq ǵylym akademııasy 2023 jyly qurylǵan. Sol kezden bastap ǵylymdy turaqty qarjylandyrý qamtamasyz etilip, akademıkterdi ashyq saılaý isi jolǵa qoıyldy. Akademııa memlekettik mártebege ıe, qazirgi tańda ol ǵylymdy strategııalyq turǵyda damytýdy, basym baǵyttardy ǵylymı-taldamalyq turǵyda qoldaýdy, sondaı-aq halyqaralyq akademııalyq qaýymdastyqpen ózara is-qımyldy qamtamasyz etip keledi. 2024 jyly qabyldanǵan «Ǵylym jáne tehnologııalyq saıasat týraly» zańǵa sáıkes, Akademııaǵa Joǵary ǵylymı uıym mártebesi berildi. Aldaǵy ýaqytta ǵylymı áleýetterin biriktirgen ǵylym akademııasy halyqaralyq deńgeıde iri ǵylymı jańalyqtarǵa qol jetkizýge múmkindik aldy, 2026 jyly 1946 jyldan bastaý alatyn Qazaqstannyń ulttyq akademııasynyń 80 jyldyq mereıtoıy bolady.
Buǵan deıin Ulttyq ǵylym jáne tehnologııalar keńesiniń otyrysynda Memleket basshysy «ǵylymy myqty eldiń memleketi de qýatty bolady. Ǵylymsyz el — qurdymǵa ketedi. Al ǵylymy ozyq el kez kelgen daǵdarysty eńsere alady» dep atap ótken edi.
— Salalyq mınıstrlik qurylǵan sátten bastap Memleket basshysy ǵylymnyń ekonomıkaǵa yqpalyn kúsheıtýdi, ony ınnovatsııalarmen tyǵyz baılanystyrýdy, sondaı-aq naqty is tyndyrýǵa baǵyttalǵan ǵylymı saıasatty jolǵa qoıýdy tapsyrǵan bolatyn. 2023 jyly Joǵary bilim men ǵylymdy damytýdyń 2023–2029 jyldarǵa arnalǵan tujyrymdamasy jáne «Ǵylym jáne tehnologııalyq saıasat týraly» jańa Zań qabyldandy. Sonyń arqasynda jas ǵalymdardy qoldaýǵa, ýnıversıtettik ǵylymdy damytýǵa, ǵylymı jańalyqtardy kommertsııalandyrýǵa jáne óńirlerdegi ǵylymı ınfraqurylymdy nyǵaıtýǵa aıryqsha kóńil bólinýde. Sondyqtan qoǵamdyq birlestiktiń Jalpy jınalysynda qabyldanǵan búgingi sheshim — ǵylymı sabaqtastyqty saqtaý, ǵylymı qaýymdastyqtyń aýyzbirligin arttyrý, ǵylym men óndiris arasyndaǵy baılanysty kúsheıtý jolyndaǵy mańyzdy qadam, — delingen akademııa habarlamasynda.
Aıta ketelik Ulttyq ǵylym akademııasynyń vıtse-prezıdenti Asqar Jumadildaev elimizdegi ǵylym salasyn damytýǵa qatysty usynysyn aıtqan edi.