Ulttyq damý jospary: 36 kórsetkishtiń 18-i oryndalmaǵan
ASTANA. KAZINFORM – Ulttyq ekonomıka mınıstrligi 2029 jylǵa deıingi ulttyq damý josparyn iske asyrýdyń 2024 jylǵy qorytyndysyn jarııalady.
Jalpy josparda 39 negizgi kórsetkish bar. Biraq onyń úsheýi («PISA testileýi: oqý saýattylyǵy, matematıkalyq saýattylyq, jaratylystaný saýattylyǵy) úsh jyl saıyn júrgiziletin zertteý arqyly anyqtalatyndyqtan 36 kórsetkish boıynsha jyldyq qorytyndy shyǵarylǵan.
Jospardaǵy 36 kórsetkishtiń 18-i oryndalmaǵan, 2 kórsetkishtiń derekteri kúzde belgili bolady. Sonda josparǵa saı oryndalǵan kórsetkishter sany — 16. Onyń ishinde bir kórsetkish 208 paıyzǵa oryndalǵan (Sý tasymaldaý arnalary arqyly aýyl sharýashylyǵyndaǵy sý shyǵynynyń deńgeıi).
Oryndalmaǵan kórsetkishterge kelsek, onyń kóbi - bıýdjettiń munaıǵa qatysty emes tapshylyǵy eńbek ónimdiliginiń ósimi, ekonomıkanyń naqty ósý qarqyny, ınnovatsııalyq salanyń belsendiligi sııaqty mańyzdy ekonomıkalyq kórsetkishter.
Mysaly, respýblıkalyq bıýdjettiń munaıǵa qatysty emes tapshylyǵy 2024 jyly jalpy ishki ónimniń 6,1 paıyzynan aspaý kerek bolǵan. Biraq ol jospar oryndalmaı, tapshylyǵy JІÓ-niń 8,1 paıyzyna jetken.
Tikeleı sheteldik ınvestıtsııalardyń jalpy aǵyny 24,8 mlrd dollar bolady dep josparlanǵanmen, is júzinde 17,2 mlrd dollar ınvestıtsııa tartylǵan.
Úkimet bızneske berilgen kredıtterdiń ósimin 2022 jylmen salystyrǵanda 40 paıyzǵa jetkizýdi josparlap, shyn máninde 35,8 paıyz ósimge ǵana qol jetkizgen.
Qonaqúılerdiń qyzmetin paıdalanǵan týrıster sanyn 2024 jyly 2 mln adamǵa jetkizý josparlanǵan. Al is júzinde 1,3 mln adam týrıst qonaqúıler qyzmetin tutynǵan.
Innovatsııa salasyndaǵy belsendilik deńgeıi josparda 145, paıyz bolsa, is júzinde 11,9 paıyz ǵana bolǵan.
Halyqtyń jalpy shyǵynyndaǵy azyq-túlikke jumsaıtyn shyǵyndardyń úlesin 49,4 paıyzǵa túsirý jospary da oryndalmaǵan — 50,6%.
2024 jyly qalalardyń áleýmettik ıgiliktermen jáne qyzmettermen qamtamasyz etilý deńgeıi 89% bolǵan. Al jospar boıynsha bul kórsetkishti 90,4%-ǵa jetkizý kózdelgen edi.
Aıta keteıik, Úkimet 2026 jyly eldegi ınflıatsııa deńgeıi 10 paıyzdan tómen bolady dep boljap otyr.