Ulttyq bank «Qazatomónerkásip» AQ aktsııalaryn satyp almaqshy
ASTANA. KAZINFORM – Qazaqstan Respýblıkasynyń Úkimeti respýblıkalyq bıýdjetti qarjylandyrý maqsatynda Ulttyq qorǵa (budan ári – UQ) jalpy somasy 467,4 mlrd teńgege «Qazatomónerkásip» AQ aktsııalaryn satyp alý týraly sheshim qabyldady. Bul týraly Ulttyq banktiń baspasóz qyzmeti málim etti.
Osy sheshimdi iske asyrý aıasynda UQ qarajatyn basqarýshy retinde Qazaqstan Respýblıkasynyń Ulttyq Bankine (QUB) Ulttyq qordan shamamen 970 mln AQSh dollary somasyna shetel valıýtasyn teńgege aıyrbastaýdy júzege asyrady.
Operatsııanyń jospardan tys sıpatyn eskere otyryp, kórsetilgen kólemdi qysqa ýaqyt aralyǵynda satý valıýta naryǵynyń teńgerimdiligine eleýli áser etýi múmkin.
«Osyǵan baılanysty Ulttyq Banktiń altyn-valıýta rezervterine UQ aktıvterin tikeleı satý arqyly Ulttyq Bank birjolǵy konversııalyq operatsııa júrgizýge nıetti. Sonymen birge naryqtyq beıtaraptylyqty saqtaý maqsatynda jáne osy operatsııany valıýta naryǵyna shyǵarý aıasynda Ulttyq Bank valıýta naryǵynda osy kólemdi birkelki satýdy júzege asyrýdy josparlap otyr. Osylaısha, osy jyldyń shildesinen bastap Ulttyq Bank 4 aı ishinde 970 mln AQSh dollaryn satýǵa kirisedi, aıyna 243 mln AQSh dollary kóleminde aıyrbastalady», — delingen habarlamada.
Bul shara valıýta naryǵyna birjolǵy konversııalyq operatsııanyń áserin beıtaraptandyrýdy qamtamasyz etýge arnalǵan erekshe shara bolyp tabylady.
Valıýta naryǵyndaǵy satý kólemi Ulttyq Banktiń statıstıkalyq aqparatynyń shyǵý kestesine sáıkes jarııalanatyn bolady.
Transparenttilik jáne ashyqtyq qaǵıdaty aıasynda Ulttyq Bank valıýta naryǵynda júrgiziletin barlyq operatsııa týraly tolyq aqparatty jarııalaýdy jalǵastyrady.
