Ulttyq bank bazalyq mólsherlemeni kóterdi

ASTANA. KAZINFORM — Ulttyq Banktiń Aqsha-kredıt saıasaty komıteti bazalyq mólsherlemeni bazalyq mólsherlemeni +/- 1 paıyzdyq tarmaq dálizimen jyldyq 16,5% deńgeıinde belgileý týraly sheshim qabyldady.

Ulttyq bank taratqan resmı málimdemege súıensek, mundaı sheshim qabyldaýǵa jańartylǵan boljamdar men ınflıatsııalyq táýekelderdiń balansy negiz bolǵan.

— Baǵanyń aǵymdaǵy ósý qarqyny joǵary deńgeıge jetip keledi. Bul óz kezeginde aqsha-kredıt sharttaryn aıtarlyqtaı jeńildetedi. Sondyqtan ınflıatsııanyń ósý táýekelin azaıtý úshin belsendi ári pármendi sharalar qajet. Inflıatsııanyń barlyq kórsetkishinde ósý baıqalady. Jyldyq ınflıatsııa aqpanda 9,4%-ǵa deıin jedeldedi. Barlyq komponent boıynsha baǵanyń ósý qarqyny jedeldegeni baıqalady. Ásirese qyzmetter baǵasynyń ósýi aıtarlyqtaı úles qosyp otyr. Aqpanda aılyq ınflıatsııa edáýir ósip, ortasha tarıhı dınamıkadan aıtarlyqtaı asyp tústi. Aılyq bazalyq jáne maýsymdyq faktorlardan tazartylǵan ınflıatsııa kórsetkishterinen (tıisinshe, aqpanda bir jylǵa eseptegende — 14,2% jáne 16,9%) fıskaldyq yntalandyrý jáne tutynýshylyq kredıt berýdiń (2024 jyldyń qorytyndysy boıynsha jylma-jyl 33,5% ósim) shamadan asyp ketý jaǵdaıynda ishki suranys jaǵynan qysymnyń aıtarlyqtaı údegeni kórinedi. Sonymen birge aqpanda halyqtyń ınflıatsııalyq kútýleri taǵy da 13,7%-ǵa deıin ósti, — dep jazady Ulttyq bank sarapshylary.

Sondaı-aq, Reseıde ınflıatsııa qarqyny artyp, munaıdyń usynysy suranystan joǵary bolýy da bazalyq mólsherlemeni qaıta qaraýǵa túrtki bolǵan.

— Aldaǵy jyldarǵa ınflıatsııa boljamy jańa faktorlar eskerile otyryp kóterildi. Ol 2025 jyly 10-12%, 2026 jyly 9-11% sheginde kútiledi. 2027 jyldyń qorytyndysy boıynsha ınflıatsııa tejeýshi aqsha-kredıt saıasatynyń jáne josparlanǵan salyq reformasyna baılanysty fıskaldyq yntalandyrýdy qysqartý nátıjesi retinde 5,5-7,5% deńgeıine deıin tómendeıdi, — delingen Ulttyq bank túsindirmesinde.

Jyl basynda bazalyq mólsherleme 15,25% deńgeıinde belgilengen bolatyn.