Ulttyq aýyl sharýashylyǵy sanaǵyn ótkizýge 5,2 mlrd teńge bólindi
ASTANA. KAZINFORM – Bıyl elimizde araǵa 18 jyl salyp aýyl sharýashylyǵy sanaǵy ótedi. Sanaqty ótkizýge 5,2 mlrd teńge bólindi. Bul týraly Ulttyq statıstıka bıýrosy Kazinform agenttiginiń resmı saýalyna joldaǵan jaýapta aıtylǵan.
— Memleket basshysynyń 2023 jylǵy 26 sáýirdegi tapsyrmasyna jáne Úkimettiń 2023 jylǵy 29 jeltoqsandaǵy №1248 qaýlysyna sáıkes Qazaqstan Respýblıkasynyń Ulttyq aýyl sharýashylyǵy sanaǵyn 2025 jyly 1 tamyz ben 20 qazan aralyǵynda ótkizý týraly sheshim qabyldandy. Premer-Mınıstrdiń 2023 jylǵy 29 jeltoqsandaǵy №201-ó Ókimimen Ulttyq aýyl sharýashylyǵy sanaǵyn daıyndaýǵa jáne ótkizýge baılanysty uıymdastyrýshylyq jáne nusqaý berý máselelerin sheshý jónindegi Arnaıy komıssııa quryldy. Ulttyq aýyl sharýashylyǵy sanaǵyn ótkizý úshin 5 247,0 mln teńge somasynda qarajat bólindi, - delingen jaýapta.
Sanaq sýbektilerine zańdy tulǵalar jáne olardyń qurylymdyq ne oqshaýlanǵan bólimsheleri, dara kásipkerler, onyń ishinde mal sharýashylyǵy, ósimdik sharýashylyǵy jáne balyq sharýashylyǵy qyzmetin júzege asyratyn sharýa qojalyqtary jatady. Sondaı-aq jeke sharýashylyǵyn júrgizýge arnalǵan jer ýchaskeleri (saıajaı, baqsha, kókónis ýchaskeleri) jáne aýyl sharýashylyǵy úı janýarlary bar úı sharýashylyqtary da enedi.
Atap aıtqanda jer jáne egistik alqaby, aýyl sharýashylyǵy janýarlary men qustardyń sany, aýyl sharýashylyǵy mashınalary men jabdyqtary, mal sharýashylyǵy keshenderi men qus fabrıkalary, óndiristik ǵımarattar men aýyl sharýashylyǵy janýarlary men qustardy ustaýǵa arnalǵan úı-jaılar, aýyl sharýashylyǵy ónimderin saqtaýǵa arnalǵan ǵımarattar men qurylystar sanalady.
Byltyr bıýro sanaq paraqtaryn, aqparattyq júıelerdi synaqtan ótkizip, uıymdastyrý jumysynyń deńgeıin baǵalaý úshin 54 eldi mekende pılottyq aýyl sharýashylyǵy sanaǵyn ótkizdi. Sonyń arqasynda kemshin tustar men kúsheıtýdi qajet etetin baǵyttar anyqtalǵan.
— Bıyl daıyndyq sheńberinde biz quqyqtyq, ádistemelik, uıymdastyrýshylyq, tehnologııalyq jáne materıaldyq-tehnıkalyq sıpattaǵy keshendi sharalardy qolǵa alyp jatyrmyz. Búginde aımaqtarda aýyl sharýashylyǵy sanaǵyn uıymdastyrý úshin qajet bólimderdiń qurylymy bekitilip, qyzmetkerlerdiń laýazymdyq nusqaýlyqtary ázirlendi. Úı-úıdi aralap suraý júrgizetin qyzmetkerlerdi jumysqa alý tártibi pysyqtalyp jatyr. Jalpy, aýyl sharýashylyǵy sanaǵyn ótkizý úshin 4,6 myńnan astam sanaq personaly tartylady. Olardyń barlyǵymen tıisti eńbek sharttary jáne qyzmet kórsetý kelisimderi jasalady, - dep habarlady vedomstvodan.
Sanaq eki formatta ótkiziledi: birinshisi – onlaın, ekinshisi – ıntervıýerlerdiń aralaýy arqyly.
- 1-31 tamyz aralyǵynda aýyl sharýashylyǵy kásiporyndary, dara kásipkerler, sharýa qojalyqtary jáne jeke qosalqy sharýashylyqtar suraqtarǵa sanaq.gov.kz portalynda onlaın túrde jaýap bere alady. Sanaqtan onlaın túrde ótip úlgermegen azamattardyń úıine 20 qyrkúıek pen 20 qazan aralyǵynda ıntervıýerler barady. Olar sanaqty planshet kómegimen júrgizedi. Sanaqqa onlaın qatysýshyǵa sanaq paraqtaryn toltyrý boıynsha keńes berýge daıynbyz. Saıtta ol úshin arnaıy nusqaýlyqtar bolady, sonymen qatar 1446 baılanys ortalyǵyndaǵy áriptesterimiz barlyq suraqqa egjeı-tegjeıli jaýap beredi, - dep málimdeıdi Ulttyq statıstıka bıýrosynan.
Eske salsaq, elimizde alǵashqy aýyl sharýashylyǵy sanaǵy 2006-2007 jyldary ótkizilgen. Sodan beri sala sýbektilerin túgendeý jumystary júrgizilgen joq.
Sanaq aýyl sharýashylyǵynyń naqty jaǵdaıy týraly tolyq aqparat alý, aýyl sharýashylyǵy óniminiń básekege qabilettiligin arttyrýǵa baǵyttalǵan áleýmettik-ekonomıkalyq saıasatty ázirleý, sharýashylyq júrgizýshi sýbektilerdiń naqty sanyn anyqtaý maqsatynda ótkiziledi.
Strategııalyq josparlaý jáne reformalar agenttiginiń aqparaty boıynsha, bul salada sońǵy jyldary resmı derekkózderdegi málimetterde orta eseppen 20% alshaqtyq qalyptasqan.