Ulttar lıgasy: Horvatııa Frantsııa quramasyn tize búktirdi

ASTANA. KAZINFORM — Fýtboldan UEFA Ulttar lıgasynda pleı-off kezeńiniń bastapqy matchtary máresine jetti.

A lıgasynda shırek fınaldyq alǵashqy oıynda Horvatııa Frantsııany 2:0 esebimen utty. 
Birinshi taımda Ante Býdımır men Ivan Perıshıch mergendik tanytyp, komandasyna jeńis syılady.

Osylaısha, horvatııalyqtar jartylaı fınalǵa jaqyndaı tústi.

Danııa ekinshi taımda alańǵa shyqqan Rasmýs Hoılýndtyń goly arqasynda Krıshtıaný Ronaldý bastaǵan Portýgalııadan aılasyn asyrdy – 1:0.

Germanııany qabyldaǵan Italııa Sandro Tonalıdyń kómegimen birinshi bolyp esep ashqanymen, ekinshi taımda ese jiberip qoıdy – 1:2. Tım Klıaındınst tarazy basyn teńestirse, Leon Goretska jeńis golyn soqty. 

Nıderland óz alańynda Ispanııamen teń tústi – 2:2. Ispanııadan Nıko Ýılıams pen Mıkel Merıno, Nıderlandtan Kodı Gakpo men Teıanı Reınders kózge tústi. 

Sondaı-aq A/B lıgasynyń pleı-off kezeńinde Ýkraına myqty sanalatyn Belgııanyń 3:1 esebimen meselin qaıyrdy. 

Túrkııa dál sondaı eseppen Majarstannyń mysyn basty. Grekııa óz alańynda Shotlandııadan 0:1 esebimen utylsa, Aýstrııa Serbııaıen teń oınady (1:1). 

Al B/C lıgalarynyń pleı-off satysynda Grýzııa syrt alańda Armenııany oısyrata utty – 3:0. 

Slovakııa – Slovenııa matchynda esep ashylmasa, Kosovo Islandııadan basym tústi – 2:1.

Bolgarııa óz alańynda Irlandııaǵa jol berdi – 1:2.

Qarymta kezdesýler 23 naýryzda ótedi. 

Eske sala keteıik, budan buryn Ulttar lıgasynda pleı-off kezeńi bastalatynyn jazǵan bolatynbyz.