Ulytaýda sheneýniktiń salǵyrttyǵynan 10 úı sý astynda qalǵan

ASTANA. KAZINFORM – Ulytaý oblysy Tabıǵı resýrstar basqarmasynyń basshysy laýazymdyq ókilettikterin teris paıdalanǵan. Bul týraly Qarjylyq monıtorıng agenttigi habarlady.

«Qarjylyq monıtorıng agenttigi Ulytaý oblysy Tabıǵı resýrstar basqarmasynyń basshysyna qatysty laýazymdyq ókilettikterdi teris paıdalaný faktisi boıynsha, sondaı-aq «Jezdi ózenin sanatsııalaý» jobasy sheńberinde tıisti túrde jumys atqarmaǵan tulǵalarǵa qatysty qylmystyq isterdi aıaqtady. Tergeý barysynda qurylys normalarynyń oryndalmaǵany, sondaı-aq jobalaý qujattamasynan aýytqýlarǵa jol berilgeni anyqtaldy, bul jobalaýshy málimdegen ózenniń sý kóleminiń ótkizý qabiletin azaıtty», - delingen agenttik habarlamasynda.

Vedomstvonyń habarlaýynsha oblystyń tabıǵı resýrstar basqarmasynyń basshysy is júzinde jasalmaǵan jumystardyń aktilerine qol qoıǵan. Qurylys obektisine barmastan tehnıkalyq jáne avtorlyq qadaǵalaýshylar da oryndalǵan jumystardyń aktilerine qol qoıyp bergen.

Laýazymdy tulǵalardyń atalǵan qylmystyq áreketteriniń saldarynan kókteminde 10 jeke úı sý astynda qalǵan.

Qylmystyq istiń materıaldary sotqa jiberildi.