Ulytaýda І respýblıkalyq «Qobyzym — qońyrym» baıqaýy ótti
JEZQAZǴAN. KAZINFORM — 23-24 shilde kúnderi І Respýblıkalyq «Qobyzym — qońyrym» qobyzshylar baıqaýy ótti. Bul baıqaýdyń Ulytaý oblysy, Jezqazǵan qalasynda uıymdastyrylýynyń ózindik sebebi de bar. Qoılybaı baqsy — osy Ulytaý óńirinde týyp-ósken, qazaq halqynyń rýhanı mádenıetine zor úles qosqan tarıhı tulǵa. Qorqyttyń qobyzyn, sarynyn alǵash mıras tutqan óner ıesi de osy Qoılybaı bolǵan.
Baqsylyǵymen de, qobyzshylyǵymen de aty ańyzǵa aınalǵan Qoılybaı áýlıe atyndaǵy alǵashqy qobyzshylar baıqaýyn ótkizýge Ulytaý oblysynyń ákimdigi qoldaý bildirse, baıqaýdy oblystyq mádenıet, tilderdi damytý jáne arhıv isi basqarmasy men oblystyq mádenı-saýyq jáne shyǵarmashylyq ǵylymı-ádistemelik ortalyǵy uıymdastyryp ótkizdi.
S.Qojamqulov atyndaǵy qazaq mýzykalyq drama teatry qobyzdyń tylsym únin tyńdaýǵa qushtar kópshilikti eki kún boıy ózine tartyp, ózinde tusady. Respýblıkalyq deńgeıde ótkizilip otyrǵan qobyzshylar baıqaýynyń basty maqsaty Qoılybaı áýlıeniń emshiligimen qatar, qobyzshy bolǵanyn kópke tanytý, nasıhattaý boldy.
Sonymen qatar, jas urpaqty qobyz ónerine baýlý, halyqtyń kóneden kele jatqan ónerin urpaq jadynda jańǵyrtý bolyp tabylady. Baıqaý barysynda kórermen kópshilik ony uıymdastyrýshylardyń ulttyq aspaptar mektebiniń dástúrin saqtap, kúıdiń umytylyp bara jatqan oryndaýshylyq dástúrin qaıta túletýlerine kýá bolysty.
Baıqaý sonymen birge, árıne, qobyzda talantty oryndaýshylardy anyqtap, olardyń sheberlikterin shyńdaýǵa múmkindik jasady.
Baıqaýǵa elimizdiń túpkir-túpkirinen 12 úmitker qatysty.
Bas júlde ıegeri Ásen Smaıl — Taldyqorǵan qalasy.
І oryn ıegeri Azbaev Ádlet — Almaty qalasy.
ІІ oryn ıegeri Qurmanbek Oljas — Astana qalasy.
ІІІ oryn ıegerleri Tórehanov Erasyl-Jetisý oblysy jáne Jetpisbaeva Aıaýlym- Qaraǵandy oblysynan.
Dıplomanttar: Qydyrmurat Ásel, Saılaýova Dana, Erjan Janaıym — Almaty qalasynan, Maıdanova Samal-Astana qalasynan.
Arnaıy júldeni Almaty qalasynan Bolat Araılym Qorqyt atyndaǵy júlde ıegeri atansa, Yqylas atyndaǵy júldeni Qaraǵandy qalasynan Altynbekova Gaýhar, Qoılybaı áýlıe atyndaǵy júldeni Ulytaý oblysynan Qabyl Medet jeńip aldy.