Ulytaý oblysynda «Otbasylyq ferma» jobasy ázirlenip jatyr
JEZQAZǴAN. KAZINFORM - Eshbir óńirde bolmaǵan bastama óńirdegi sharýashylyqtardy biriktirý arqyly júzege asyrylmaq.

Joba aıasynda 6 000 bas asyl tuqymdy iri qara jáne 12 900 bas asyl tuqymdy qoı satyp alynady, 2 000 bas jylqy kútip, baǵylmaq.
Jobanyń ınfraqurylymyn damytýǵa oblystyq bıýdjetten 1,2 mlrd teńge bólindi. Qarajat shopandarǵa turǵyn úı salý, mal ustaýǵa arnalǵan qora-jaılar turǵyzý, sýmen jáne elektr energııasymen qamtamasyz etýge baǵyttalǵan. Sondaı-aq jobada maldy bordaqylaý, soıý tsehy, bıe sútin óńdeý, vakýýmdalǵan et ónimderin shyǵarý sııaqty tolyq óndiristik tsıkl kózdelgen. Jobany júzege asyrýǵa oblystyń 6 aýyldyq okrýgi, 100-ge jýyq ýaqytsha jáne 22 turaqty jumysshy, 34 sharýa qojalyǵy jáne 2 aýyl sharýashylyǵy óndiristik kooperatıvi qatysady.
Negizgi maqsattarynyń biri — óńirde ashylyp jatqan bordaqylaý alańdaryn malmen turaqty jáne ýaqtyly qamtamasyz etý, azyq-túlik qaýipsizdigin qamtamasyz etýge edáýir septigin tıgizý, ishki naryqty qunarly mal azyǵymen qamtamasyz etý jáne berik jem-shóp qoryn qalyptastyrý, qoı basy sanynyń ulǵaıýyna jáne ımport táýeldiliginiń azaıýyna oń áserin tıgizý, iri jáne usaq sharýalardy biriktirý arqyly básekege qabiletti orta qalyptastyrý.
Atalǵan jobalar mal sharýashylyǵy salasynyń damýyna, mal bas sanynyń ósýine jáne ony tereń óńdeýge arnalǵan kásiporyndardy shıkizatpen qamtamasyz etýge oń áserin tıgizedi.