Ulytaý oblysynda qyzyl kirpish óndiretin zaýyt salynady
ULYTAÝ. KAZINFORM — Zhonghe Yuǎnjǐng (Chendý) qytaı kompanııasy qazaqstandyq seriktestermen Ulytaý oblysyna shamamen 10 mıllıard teńge kóleminde ınvestıtsııa quıýdy josparlap otyr.
Ulytaý oblysy ákiminiń orynbasary Jánibek Nópirovtiń tóraǵalyǵymen Zhonghe Yuǎnjǐng (Chendý) qytaı ınvestorlarymen kezdesý ótti. Kompanııa Ulytaý oblysyna shamamen 10 mıllıard teńge kóleminde ınvestıtsııa quıýdy josparlap otyr.
Investıtsııalyq jobalardyń ishinde qyzyl kirpish zaýyty, glına men qumdy-qıyrshyq tas qospalaryn óndirý jáne Jezkazǵan qalasynda turǵyn úı keshenderin salý (onyń ishinde renovatsııa jobalary) bar. Investorlar oblys aýmaǵymen tanysyp, ásirese Talap aýylyndaǵy bos jer ýchaskelerin zerttedi. Qazirgi tańda qyzyl kirpish zaýyty úshin jer máselesi, sondaı-aq jalpy paıdaly qazbalardy óndirýge lıtsenzııa alý máseleleri talqylanyp jatyr.
Kompanııa óńirde ınfraqurylymdyq jobalardy iske asyrýǵa úlken qyzyǵýshylyq tanytyp otyr. Oblys ákimdigi uzaq merzimdi seriktestik jergilikti ekonomıkany damytýǵa jáne jańa jumys oryndaryn ashýǵa aıtarlyqtaı úles qosady dep senedi.
Aıta ketelik Ulytaý oblysynda 4 temirjol vokzaly qaıta jańǵyrtylady.