Ulytaý oblysy qandaı azyq-túlikpen ózin-ózi qamtyp otyr

JEZQAZǴAN. KAZINFORM — Ulytaý oblysy áleýmettik azyq-túlik taýarlarynyń 4 túri boıynsha ózin-ózi qamtamasyz etedi. Bul týraly óńir ákimi Dastan Ryspekov eseptik kezdesýinde aıtty. 

Óńirdi óz ónimderimen qamtamasyz etý maqsatynda Jezqazǵan qalasynda jumyrtqa baǵytyndaǵy qus fabrıkasy jáne Jańaarqa aýdanynda mal sharýashylyǵy kesheni men mal soıý tsehy iske qosylǵan.

— Qazirgi tańda oblys áleýmettik azyq-túlik taýarlarynyń 4 túri (sıyr eti, un, nan, jumyrtqa) boıynsha ózin-ózi qamtamasyz etedi. Kelesi jyly qosymsha eki taýar túrimen (kartop, qus eti) ishinara qamtý josparlanyp otyr, — dedi Dastan Ryspekov elordada Ortalyq kommýnıkatsııalar qyzmetinde.

Ákimniń aıtýynsha, bıyl jalpy quny 17 mlrd teńge bolatyn 10 joba iske asyrylyp keledi, onyń ishinde 8 mlrd teńgege 7 joba bıyl iske qosylady.

«Aýyl Amanaty» jeńildetilgen 2,5% nesıeleý baǵdarlamasy aıasynda bıyl 700 mln teńgege 100 joba qarjylandyryldy.

— Jalpy oblys qurylǵaly aýyl sharýashylyǵy salasyna 8,5 mlrd teńge ınvestıtsııa tartyldy. Jyl basynan bastap bul salaǵa 2,5 mlrd teńge ınvestıtsııa quıylyp, ótken jylǵy sáıkesinshe kezeńimen salystyrǵanda 46 paıyzǵa ósim kórsetti, — dedi óńir basshysy.

Aıta keteıik, Ulytaý oblysynyń bıýdjeti 30 mlrd teńgege artty.

Buǵan deıin Dastan Ryspekov Jezqazǵanda eski fabrıka ǵımaraty kásipkerlerge beriletinin aıtqan edi.