«Ulytaý» fýtbol klýbynyń bas bapkeri taǵaıyndaldy
ASTANA. KAZINFORM — Nurken Qaldybekuly Mazbaev «Ulytaý» fýtbol klýbynyń bas bapkeri bolyp taǵaıyndaldy.
Bul mamannyń esimi qazaq jankúıerlerine jaqsy tanys. Ol elimizdegi fýtbolynyń damýyna zor úles qosqan tájirıbeli bapker jáne burynǵy kásibı fýtbolshy.
Nurken Mazbaev qazirge deıin birqatar qazaqstandyq klýbqa bas bapker boldy. Oǵan qosa jastar arasyndaǵy fýtboldy damytýǵa erekshe kóńil bóldi.
Bas bapkerdiń kómekshisi retinde jattyqtyrýshy Sergeı Aleksandrovıch Pak taǵaıyndaldy.
Eske salsaq, buǵan deıin Ivan Gennadevıch Azovskıı «Ulytaý» fýtbol klýbyndaǵy qyzmetin resmı túrde aıaqtady.
2025 jylǵy maýsymda Ivan Azovskıı baptaǵan komanda Premer-lıgada 15 match ótkizip, 3 jeńiske jetti, 3 teń oıyn kórsetti.
Bas bapker 2023 jyly klýb qurylymyna qosylyp, aldymen fýtbol ortalyǵynyń jetekshisi qyzmetin atqardy. Keıinnen negizgi komandany qabyldap, 2024 jylǵy maýsym qorytyndysy boıynsha «Ulytaýdy» alǵash ret Qazaqstan Premer-lıgasyna shyǵardy.