Ulybrıtanııada qysqa merzimdi jaza túrleri joıylady

ASTANA. KAZINFORM – Ulybrıtanııa qylmystyq-atqarý júıesin reformalaý aıasynda bir jylǵa deıingi qysqa merzimdi bas bostandyǵynan aıyrý jazalaryn joıýdy jáne qoǵamdyq jumystardy qatańdatýdy josparlap otyr, dep habarlaıdy agenttiktiń menshikti tilshisi.

Sky News málimetinshe, úkimet qyrkúıek aıynda jazalaý júıesin túbegeıli ózgertetin zań jobasyn engizedi. Reformanyń negizgi maqsaty – qysqa merzimdi túrmelik jazalardy azaıtyp, qamaýda otyrmaıtyndarǵa qatysty baqylaýdy kúsheıtý.

Zań jobasy boıynsha 12 aıǵa deıingi kópshilik túrme jazalary alynyp tastalady. Erekshe jaǵdaılarda ǵana, mysaly turmystyq zorlyq-zombylyq isterinde mundaı jaza qoldanylmaq. Onyń ornyna shartty jazalar keńeıtilip, qoǵamdyq jumystardyń merzimi qatańdatylmaq.

Shartty jaza merzimi 2 jyldan 3 jylǵa deıin uzartylmaq.

Sonymen qatar, AQSh-tyń Tehas shtatyndaǵy tájirıbege uqsas, jaqsy tártibi úshin shartty túrde merziminen buryn bosatý júıesi engiziledi. Bul tek úlgili sottalǵandarǵa qatysty qoldanylady.

Alaıda, terrorıster men asa qaýipti qylmyskerlerge bul jeńildik júrmeıdi.

Jańa júıede qamaýdan tys jazalaý túrleri de aıtarlyqtaı kúsheıtiledi. Olardyń qatarynda stadıondar men kontsert zaldaryna barýǵa tyıym salý, barlarǵa kirýdi shekteý, esirtkige test tapsyrý mindettemesi bar. Balama jaza retinde júrgizýshi kýáliginen aıyrý, belgili bir aımaqtan shyqpaý nemese naqty jerde turý mindeti qarastyrylmaq. Buǵan deıin bul sharalar tek jekelegen baptarda qoldanylyp kelse, endi keń aýqymdy quqyq buzýshylyqtarǵa taǵaıyndalýy múmkin.

Ulybrıtanııadaǵy reformanyń basty sebebi – túrmelerdegi oryn tapshylyǵy. Qazir elde jańa túrme ǵımarattary salynyp jatyr. Olar qosymsha 14 myń orynmen qamtamasyz etýi tıis, onyń 2,5 myńy paıdalanýǵa berildi.

Biraq tek ınfraqurylymdy keńeıtý máseleni sheshpeıdi.

Sarapshylardyń aıtýynsha, reforma bolmasa, aldaǵy aılarda elde túrmelerdiń tolyp ketýi, sot protsesteriniń keshigýi jáne polıtsııa tarapynan tutqyndaýdan bas tartý jaǵdaılary oryn alýy múmkin.

Aıta keteıik, Ulybrıtanııa zańsyz mıgranttardyń elge enýimen kúreske taǵy 100 mln fýnt bólmek.