Ulybrıtanııada qaryzǵa belsheden batqandar kóbeıdi
Ulybrıtanııada ótken jyly 4 mıllıonǵa jýyq adam kedeıshiliktiń qamytyn kıgen. Olardyń 1 mıllıonǵa jýyǵy — bala. Bıyl da bul jaǵdaı jalǵasyp jatyr. 16 mıllıonnan astam turǵyn komýnaldyq tólemdi keshiktirip, nesıe men turǵyn úı salyǵyn tóleı almaı qınalýda. Olardyń 2 mıllıony mundaı jaǵdaıǵa birinshi ret tap bolǵan, dep habarlaıdy Kazinform.
London turǵyny Kerrı Banda — qaryzdan qutylýdyń jolyn izdep júrgenderdiń biri. 20 000 fýnt bereshegi bar jáne ol soma kún sanap ósip keledi.
«Bólip tólesem de bitetin túri joq» dep nalıdy. Kerrı aptasyna eki kún dárigerdiń kómekshisi bolyp jumys isteıdi. Jalaqysyna qosa járdemaqy alsa da, iship-jemine jetkize almaıdy. Ol búgin azyq-túlikpen tegin qamtamasyz etetin qaıyrymdylyq uıymyna taǵy da qol jaıyp keldi.
«Men jalqaý emespin. Óte kóp jumys isteımin. Biraq áleýmettik jaǵdaıym qıyn», - deıdi Kerrı Banda.
Statıstıkaǵa sáıkes, kedeıshilik qamytyn kıgenderdiń arasynda jergilikti bıýdjetke bereshegi barlar kóp. Olar járdemaqylarynyń teń jartysyn turǵyn úı salyǵy úshin tóleýge májbúr. Buǵan kommýnaldyq aqy men nesıeni qosyńyz. Ásirese, balaly otbasylarǵa qıyn.
«Jarty kún istep, eden jýýshy bolyp tapqan tabysymdy gaz ben jaryqqa áreń jetkizip júrmin. Kún salqyndaǵan soń gazǵa úsh ese kóp aqy tóleımiz. Ótken jyly páterdiń temperatýrasy mınýs eki bolyp, qymtanyp jatýymyzǵa týra keldi. Óıtkeni bereshegim bolǵan soń gaz sónip qaldy», - deıdi jalǵyzbasty ana Jasmın Genrı.
Ómir súrý qunynyń qymbattaýy men banktegi paıyzdyq mólsherlemeniń ósýi halyqtyń moınyna qaryz qarǵybaýyn taqty. Ulybrıtanııalyqtar tutynýshylyq nesıe men ıpoteka boıynsha burynǵydan kóp tóleýge májbúr. Budan bólek páter jaldaý aqysy 12 paıyzǵa qymbattap otyr. Bul sońǵy toǵyz jyldaǵy eń joǵarǵy ósim. Bıliktegiler bolsa, kedeıshilikpen kúres qarqyndy júrip jatyr deýden ári asa almaı otyr.
«2010 jyldan beri kedeıshiliktiń qamytyn kıgenderdiń sany 1,7 mln adamǵa azaıdy. Olardyń 400 myńy bala. Biraq biz qol qýsyryp qarap otyrǵan joqpyz. Mınıstrlik kúnkóris mınımýmyn jabý úshin 800-deı tabysy tómen otbasyǵa mıllıondap járdemaqy tóledi. Múmkindigi shekteýli 6 mln. adamǵa da qol ushyn sozdyq. Sáýir aıynda kúnkóris mınımýmy 9,7 paıyzǵa ósti», - deıdi Ulybrıtanııanyń Eńbek jáne zeınetaqy mınıstri Mel Straıd.
Qarjylyq saýattylyqty arttyrýmen aınalysatyn memlekettik mekemedegilerdiń aıtýynsha, árbir jetinshi boryshker máseleni sheshý úshin esh áreket etpeıdi. Al bul bolashaqta olarǵa úlken qıyndyqtar týǵyzatyny sózsiz. Jaǵdaıdy kúrdelendirmeý úshin yńǵaıly tólem shemasyn usynatyn kompanııaǵa dereý habarlasýlary qajet. Sarapshylar kerisinshe, ınflıatsııamen kúresti kúsheıtý kerek deıdi. Óıtkeni halyqtyń tapqan-taıanǵanyn qymbatshylyq eselep jutyp jatyr.
