Londonda qansorǵyshtar qaptap ketti
Ulybrıtanııanyń myńdaǵan turǵyny úılerimizde qandala qaptap ketti dep shaǵymdanýda. Londondaǵy dezınfektsııamen aınalysatyn mekemeler shaqyrýdyń kúrt kóbeıgenin rastap otyr. Qandala týraly Gýglden aqparat izdeıtin adamdardyń sany tórt esege jýyq ósken, dep habarlaıdy Kazinform.
Parıj halqyn shýlatqan zııankester Londonda saıahattap júr.
Kıim-keshek pen qol júgine jabysyp kelgen jándikter La-Mansh buǵazy arqyly Ulybrıtanııa astanasyna da jetti.
Áleýmettik jeliler men buqaralyq aqparat quraldarynda dál osyndaı taqyryptaǵy vıdeolar men maqalalar kóp.
Bas shahardyń meri Sadık Han qandalamen kúreste aıanbaımyz dep otyr.
«Júıeli túrde metrolar men avtobýstardy tazalap qoımaı, Frantsııadan jolaýshy tasıtyn kólik kompanııalarymen de sóılesip jatyrmyz. „Londondyqtarǵa arnalǵan qoǵamdyq kólik“ mekemesi tazalyqqa asa mán beretinine sendirgim keledi. Parıjdegi áriptesterimizben máseleniń sheshý joldary týraly aqyldasýdamyz. Birqatar aldyn alý sharalaryna baılanysty jaǵdaı Londonda da ýshyǵa túsedi dep oılamaımyz», — deıdi London meri Sadık Han.
Qandala — uzaq jasaıtyn jáne tuqymy tez kóbeıetin jándik. Naýqastyń qanyn sorǵannan keıin saý adamǵa ınfektsııany juqtyrý qabileti bar. Ony tek las jerlerde, eski párterlerde meken etedi dep oılaý qate.
Qymbat úılerdegi kórpe-tósek pen jıhazdardyń arasynan da tabylyp jatady. Qarapaıym adamdardyń ózdiginen zııankespen kúresýi qıyn. Mamandar ǵana qandalanyń birjola kózin joıa alady.
«Bul halyqtyń jıi saıahattap, olardy úıge alyp kelýlerimen baılanysty bolýy múmkin. Taǵy bir sebep qazir kúnkóris qıyndap, tabys azaıdy. Bizdi shaqyrýǵa kópshiliktiń qaltasy kótermeıdi», — deıdi dezınfektsııalyq kompanııanyń dırektory Devıd Lodj.
Frantsııa bıligi Parıj ben Marsel qalalaryndaǵy jaǵdaılardyń ýshyǵa túskeni týraly aqparat berýdi azaıtty.
Eki eldiń joǵary laýazymdy sheneýnikti jumys josparyn pysyqtaý úshin kezdesip te jatyr.
Aljırde qosymsha medıtsınalyq skrınıngtiń kómegimen jándikpen birge saıahattaýshylardy toqtatý úshin qaýipsizdik sharalaryn kúsheıtip jatyr.
«Men qandalany 20 jyldan beri zerttep kelemin. Parıjde bul saıası problemaǵa aınaldy. Sondyqtan aqparat quraldary taqyrypty dúrliktirip jatyr. Barlyq elderde jaǵdaı shamalas der edim», — deıdi entomolog ǵalym Rıchard Neılor.
Qandalanyń kóbeıgeni týraly aqparat bos daqpyrt, ásire aıtylǵan deıtinder de bar.
Biraq qansorǵyshtardyń baqylaýdan shyqqanyn olar rastaıdy.
Jaǵdaı 30-40-shy jyldardaǵydan kúrdeli kórinedi.
Óıtkeni jándikterdiń zalalsyzdandyratyn hımııalyq preparattarǵa degen tózimdiligi nyǵaıǵan.
