Ulybrıtanııada eń qymbat kólik nómiri satylmaq
ASTANA. KAZINFORM – Londonda qarashanyń basynda RM Sotheby’s aýktsıon úıi «1F» memlekettik nómirin saýdaǵa shyǵarady, dep habarlaıdy Kazinform agenttiginiń Londondaǵy menshikti tilshisi.
Uıymdastyrýshylardyń baǵalaýynsha, «Formýla-1»-di eske salatyn bul nómir £800 myńnan £1,2 mıllıonǵa deıin tabys ákelýi múmkin. Eger saýda sátti ótse, «1F» Ulybrıtanııa tarıhyndaǵy eń qymbat avtomobıl nómiri atanbaq. Buǵan deıingi rekord «25 O» nómirine tıesili bolǵan, ol £518 myńǵa satylyp, qazirgi tańda Ferrari LaFerrari sýperkarynda ornatylǵan.
Aýktsıon 1 qarasha kúni ótedi. «1F» nómiri alǵash ret 1957 jyly Esseks graftyǵynda tirkelgen. Sol ýaqyttan beri ol birneshe eksklıýzıvti kólikterge, sonyń ishinde Ferrari 812 GTS modeline ornatylǵan.
— Biregeı jeke nómirlerge degen qyzyǵýshylyq áli de joǵary. Ádette eń joǵary baǵa qysqa kombınatsııalar úshin tólenedi, degenmen qazirgi rekord úsh tańbaly nómirge tıesili. «1F» buǵan deıin de iri somaǵa satylǵan, sondyqtan jańa rekord ornaýy ábden múmkin, — dedi Daily Mail basylymyna bergen suhbatynda RM Sotheby’s kompanııasynyń Ulybrıtanııadaǵy satý jónindegi dırektory Sholto Gılbertson.
Jeke nómirler naryǵynyń kólemi — £2 mlrd
Ulybrıtanııa búgingi tańda jeke (personaldy) nómirler satylymy boıynsha álemdegi eń iri naryqtardyń biri. Sarapshylardyń baǵalaýynsha, onyń kólemi shamamen £2 mıllıard.
Daily Mail málimetinshe, sońǵy otyz jylda jeke nómirlerdiń quny birneshe ese ósken. Eger 1990-jyldary olardyń baǵasy £2–10 myń aralyǵynda bolsa, qazir kópshiligi £50 myńnan joǵary satylady.
Kásibı ınvestorlar sırek kezdesetin nómir kombınatsııalaryna júzdegen myń fýnt salady. Mundaı ınvestıtsııalardyń tabystylyǵy keıde saǵat, zergerlik buıym jáne klassıkalyq avtokólik naryǵynan da asyp túsedi.
Álemdik rekord — Dýbaıdaǵy «P-7» nómiri
Alaıda £1,2 mıllıon baǵalanǵan brıtandyq «1F» nómiri álemdik rekordqa jete almaıdy. 2023 jyly Dýbaıda «P-7» nómiri (onda tek «7» sany beınelengen) 55 mıllıon dırhamǵa, ıaǵnı shamamen £12 mıllıonǵa satylǵan.
Bul kórsetkish 2008 jyly dýbaılyq kásipker Saıd Abdýl Gaffar Hýrı satyp alǵan «1» nómirinen £5 mıllıonǵa qymbat. Ol nómirin Rolls-Royce Cullinan jáne Mercedes G-Wagen kólikterine ornatqan.
Buǵan deıin alǵashqy basylymdaǵy «Hobbıt» kitaby aýktsıonda rekordtyq baǵaǵa satylǵan edi.