Ulybrıtanııada dúken urlyǵy rekordtyq deńgeıge ósti

ASTANA. KAZINFORM – Anglııa men Ýelste dúkenderden usaq urlyq sany rekordtyq kórsetkishke jetti – kúnine 1200-ge jýyq qylmys jasalǵan, al polıtsııa ashqan isterdiń sany eń tómengi deńgeıge deıin qysqardy – tártip saqshylary 10 oqıǵanyń birin ǵana asha aldy.

Ulybrıtanııa Ulttyq statıstıka qyzmetiniń málimetinshe, ótken jyly 430 104 dúken urlaý oqıǵasy jasalǵan. Bul aldyńǵy jyldaǵy 315 040 oqıǵaǵa qaraǵanda 37 paıyz kóp. Bul – polıtseıler qylmystyń osy túrin tirkeı bastaǵannan bergi dúken urlyǵynyń eń kóp sany. 

The Telegraph gazetiniń Ulybrıtanııanyń ishki ister mınıstrligi málimetterine silteme jasaı otyryp habarlaýynsha, kúdiktilerge dúken urlyǵy úshin aıyp taǵylǵan isterdiń úlesi 2016 jylǵy 27,7%-ben salystyrǵanda 15%-dan 10,5%-ǵa deıin tómendegen.

Brıtandyq bólshek saýda konsortsıýmynyń málimdeýinshe, urlyqtan bolǵan shyǵyn eki ese, 1,8 mlrd fýnt sterlıngke deıin ósken, al dúken qyzmetkerlerine zorlyq-zombylyq kórsetý nemese qorlaý jaǵdaılary kúnine 870-den 1300-ge deıin artty. 

Jeke tulǵalardan urlyq jasaý da 2004 jyldan bergi eń joǵary deńgeıge jetti, 2023 jyly 125 563 qylmys boldy, bul 2022 jylǵy kórsetkishten 18%-ǵa kóp. Alaıda 170 istiń birinde ǵana urylar jaýapqa tartylady.

Ótken jyly polıtseıler tirkegen tonaý sany 2022 jylmen salystyrǵanda 13%-ǵa (81 094 oqıǵa) ósti, biraq bul qylmys túrlerin tirkeý tájirıbesi bastalǵan 2003 jylmen salystyrǵanda 26%-ǵa tómen bolyp qalyp otyr.