Ulybrıtanııada alǵash ret áıel Kenterberı arhıepıskopy atandy
ASTANA. KAZINFORM – Sara Malallı resmı túrde Kenterberı arhıepıskopy qyzmetine kirisip, Anglııa shirkeýin basqarǵan alǵashqy áıel boldy, dep habarlaıdy Al Jazeera.
Inaýgýratsııa rásimi Kenterberı soborynda ótip, oǵan shamamen 2000 adam qatysty. Qonaqtardyń qatarynda Ulybrıtanııa taǵynyń murageri hanzada Ýılıam jubaıy Ketrınmen birge, Ýels hanshaıymy, sondaı-aq premer-mınıstr Kır Starmer jáne din qyzmetkerleri boldy.
Malallı XIII ǵasyrdan beri kele jatqan Áýlıe Avgýstın kafedrasyna otyrdy. Ol bul qyzmetke resmı túrde qańtar aıynda kiriskenimen, dál osy Kenterberıdegi rásim onyń qyzmetiniń jarııa bastalýy sanalady.
Alǵashqy ýaǵyzynda arhıepıskop óz qyzmetine daıyn ekenin aıtyp, Taıaý Shyǵys, Ýkraına, Sýdan jáne Mıanma sekildi qaqtyǵys aımaqtarynda beıbitshilik ornatýǵa shaqyrdy.
Sondaı-aq ol shirkeýdiń ótkendegi qaýipsizdikke qatysty qatelikterin atap ótip, shyndyq, janashyrlyq, ádildik jáne jaýapkershilik qaǵıdalaryn ustaný qajettigin aıtty. Onyń aldynda qyzmet atqarǵan Djastın Ýelbı 2024 jyly balalarǵa qatysty zorlyq-zombylyqty jasyrýǵa baılanysty janjaldan keıin otstavkaǵa ketken edi.
Rásim barysynda birneshe tilde duǵalar oqyldy. Malallı 1966 jyly Rım papasy Pavel VI arhıepıskop Maıkl Remsıge syılaǵan saqınany qabyldady. Bul saqına Genrıh VIII dáýirindegi bólinýden keıin anglıkan jáne katolık shirkeýleriniń jaqyndasýynyń sımvoly sanalady.
Malallıdiń taǵaıyndalýy anglıkan qaýymynyń konservatıvti bóliginiń synyna ushyrady. Degenmen balama basqarý ortalyǵyn qurý josparlary keıin qaıta qaraldy. Shirkeý ishindegi áıelderdiń róli men LGBT máselesine qatysty kózqaras aıyrmashylyqtary áli de saqtalyp otyr.
Aıta keteıik, byltyr qazan aıynda 63 jastaǵy Sara Mallallı Kenterberııdiń jańa arhıepıskopy bolyp taǵaıyndalǵanyn jazǵanbyz. Al ulyqtaý rásimi bıylǵy naýryz aıyna josparlanǵan edi.