Ulybrıtanııa premer-mınıstri Izraılde júr

Brıtan premer-mınıstri Rıshı Sýnak Izraılge jete sala Tel-Avıv áýejaıynda tilshilerge suhbat berip, 7 qazanda HAMAS-tyń bastaǵan shabýyly «adam aıtqysyz sumdyq terrorlyq akti» dep málimdedi. Kazinform bul týraly VVS-diń Telegram-arnasyna silteme jasap habarlaıdy.

R.Sýnak Ulybrıtanııa Izraıldi qoldaıtynyn qýattady.

«Men premer-mınıstr jáne prezıdentpen kezdesýdi asyǵa kútemin jáne áńgimemiz ónimdi bolady dep oılaımyn», – dedi ol.

Brıtan premeri Tel-Avıvke búgin tańerteń ushyp bardy. Endi Sýnak aldaǵy birneshe saǵat ishinde Izraıl premer-mınıstri Bınıamın Netanıahý jáne atalǵan el prezıdenti Isaak Gertsogpen kezdesý úshin Ierýsalımge barady.

Frantsııa prezıdenti Makron da jaqyn kúnderi osy óńirge keledi dep josparlanǵan.

Eske salaıyq, keshe Izraılge AQSh prezıdenti Djo Baıden ushyp barǵan edi. Ol Izraıl premer-mınıstr Bınıamın Netanıahý jáne eldiń áskerı kabınetiniń múshelerimen ótken kezdesýde AQSh Izraılge qoldaýyn jalǵastyratynyn aıtty.

Álem elderiniń bılik ókilderi Gaza sektoryndaǵy aýrýhanaǵa zymyranmen soqqy jasalǵannan keıin Izraılge shuǵyl saparlaı bastady. Shabýyl saldarynan kem degende 800 adam qaza tapty.

Palestına prezıdenti Mahmýd Abbas úshkúndik qaraly kún jarııalady. Al Mayadeen telearnasynyń dereginshe, ol 19 qazanǵa AQSh basshysy Djo Baıdenmen josparlanǵan kezdesýin kútpesten Ammannan ushyp ketip, Ramallaǵa oraldy.

HAMAS aýrýhanaǵa shabýylǵa Izraıldi kinálap otyrsa, ızraldik bılik buǵan palestınalyq anklavtan sátsiz ushyrylǵan zymyrandar sebep bolǵanyn jáne oǵan “Islam jıhady” jaýapty ekenin aıtýda.

7 qazan kúni Palestınadaǵy HAMAS toby Izraılge shabýyl jasap, elder soǵys jaǵdaıyna kóshken bolatyn.

Izraıl-Palestına qaqtyǵysy ýshyǵa bastaǵannan beri 3478 palestınalyq pen 1300 ızraıldik, sondaı-aq 13 jýrnalıst ajal qushty.