Ulybrıtanııa dúkenderinde urlyq kúrt kóbeıgen
Ulybrıtanııa dúkenderinde urlyq-qarlyq kúrt kóbeıdi. Kásipkerler qolynyń suǵanaǵy bar adamdarǵa salynatyn aıyppul kólemi az, polıtsııanyń jumysy sapasyz dep nalıdy.
Brıtan bólshek saýda birlestigi urylar jyl saıyn qyrýar shyǵyn ákelip jatyr dep shaǵymdanýda. Sala ókilderi qylmystyń kóbeıýine eń aldymen ómir súrý qunynyń ósýi sebep dep habarlaıdy Kazinform tilshisi.
Bul London ońtústigindegi táýlik boıy jumys isteıtin azyq-túlik dúkeni. Qasbetinde qatal polıtseıdiń sýreti ilýli tur. Іshinde «Satyp alynbaǵan zatty dorbaǵa salýǵa tyıym salynady» degen jazba bar. Budan bólek dúkenniń ár buryshynda beınebaqylaý kameralary ilýli. Dese de urlaý faktileri munda kúnde oryn alady. Jaqynda ishimdikti qoldy qylýǵa bekingen kezde dúken qyzmetkerleri eki er kisini der kezinde quryqtap úlgerdi.
«Olar syra urlaýǵa tyrysty. Biri 2 bótelkeni sómkesine tyǵyp jiberdi. Mundaı faktiler bizde kúnine 10 ret tirkeledi», deıdi dúken ıesi Ben Selvaratnom.
Ben quny 200 fýnttan, ıaǵnı 114 myń teńgeden tómen taýarlardy urlaıtyndar zań boıynsha sırek jaǵdaıda jaýapqa tartylatynyna renjıdi. Ben Selvaratnom qylmys jasaýǵa kóbine machete sııaqty sýyq qarý ustanǵandar kapıýshon men betperde kıip keletinin aıtady. Sondyqtan ol kassany armatýralanǵan shynymen qorshaýǵa májbúr bolǵan.
«Bastapqyda biz polıtsııaǵa oqys oqıǵalar týraly habarlap turdyq, biraq ýaqyt óte kele olardyń áreketsizdiginen keıin shaǵymdanýdy toqtattyq. Tirkelgen qylmystardyń 70-80%-i jabýly kúıinde qalatynyn quqyq qorǵaý organdarynyń ózderi moıyndap otyr. Sondyqtan biz jaǵdaıdy óz betimizshe sheshýge tyrysamyz», deıdi dúken ıesi Ben Selvaratnom.
Brıtan bólshek saýda birlestiginiń málimeti boıynsha, ótken jyly Anglııa men Ýelste tirkelgen urlyqtardyń sany 26 protsentke ósken. Al odan keletin shyǵyn jylyna shamamen bir mıllıard sterlıng fýntyn quraıdy. Tipti balasy bar analar da urlyqqa baryp, zattardy arbaǵa jasyrady. Et pen balyq konservilerin qoldy qylatyn zeınetkerler de kóp. Sala ókilderi muny eń aldymen ómir súrý qunynyń ósýimen baılanystyrady. Eger buryn qymbat zattar ǵana qoldy bolsa, qazir kúndelikti tutynatyn taýarlardy urlaý jıilegen. Oppozıtsııalyq leıborıster partııasyndaǵylar bılikke kelsek tártipti qatańdatyp, zańdy ózgertemiz dep otyr.
«200 fýnttan tómen taýardyń urlyǵy sırek tergeledi. Eger Leıborıster saılansa, bul qısynsyz erejeden bas tartyp, taǵy 13 000 polıtsııa qyzmetkerin Brıtan qaýymdastyqtary men negizgi kóshelerin kúzetýge jiberemiz. Bizge qala ortalyqtarynyń qaýipsizdigin qamtamasyz etý úshin batyl sharalardy qolǵa alý qajet», - deıdi Ulybrıtanııa Kóleńkeli úkimetiniń Іshki ister mınıstri Ivett Kýper.
Premer-mınıstr Rıshı Sýnak bul jaǵdaıdy jáısiz dep baǵalady. 13 iri Brıtan rıteıleri men joǵary laýazymdy polıtsııa basshysy Memlekettik mınıstrmen kezdesý úshin Daýnıng strıt 10-ǵa bardy. Rezıdentsııada olar dúken urlyqtarynyń kóbeıýine qarsy birlesken is-qımyl josparyn talqylady. Mınıstr qaýipsizdik kameralarynyń jazbalary dáleldegen barlyq qylmysty quqyq qorǵaý organdary tergeýi kerek dep kesip aıtty.
«Pegasýs jobasy aıasynda polıtsııa urlyq oqıǵalary týraly beınebaqylaý kameralarymen túsirilgen aqparatty saýda oryndarynan alatyn bolady. Foto men vıdeo Ulttyq polıtsııa bazasy arqyly tekseriledi. Bet-álpetti taný tehnologııasy qoldanylyp, polıtsııaǵa urylardyń bandasy qaı jerde shoǵyrlanǵanyn jáne olardyń qandaı dúkenge shabýyl jasaǵysy keletinin tártip saqshylary anyqtaıdy», - deıdi Ulybrıtanııanyń Qylmys, polıtsııa jáne órt sóndirý boıynsha memlekettik mınıstri Krıs Fılp.
Іs-shara josparyn bólshek saýdasymen aınalysatyndar maquldady, biraq olar «Pýdıngtiń qandaı ekenin bilý úshin aldymen dámin tatyp kórý kerek» degen aǵylshyndardyń eski maqalyn basqalardan jaqsy biledi.
Ben Selvaratnam da úkimetke senýden qalǵan. Onyń paıymdaýynsha, úkimet eń aldymen ekonomıkalyq qıyndyqtardy sheshýi kerek. Dúkenge ıelik etken 8 jyl ishinde ony 4 ret bótelkemen basynan urǵan. Qulaǵynyń joǵarǵy bóligin tistegennen keıin ony qaıta tigýge týra kelgen. Ben bıznesin satýǵa tyrysypty, biraq yqtımaldy satyp alýshylar urlyq shyǵyndarynyń kólemin bilgennen keıin raıynan qaıtqan.
