Ulybrıtanııa bıligi zańdy mıgranttarǵa qatysty erejelerdi qatańdatpaq

ASTANA. KAZINFORM – Іshki ister mınıstri Shabana Mahmut atap ótkendeı, úkimet elde turýǵa yqtııarhat alýshylar úshin jańa talaptar engizýdi kózdep otyr, dep habarlaıdy TASS aqparat agenttigi. 

Ulybrıtanııa zańdy mıgranttar turýǵa yqtııarhat alýǵa ótinish bergenge deıin elde turýy tıis merzimin eki esege (10 jylǵa deıin) uzartady.

-Keıingi jyldary kóship kelýshiler sany óte joǵary bolýyna baılanysty 2026-2030 jyldar aralyǵynda boljam boıynsha 1,6 mln adam elde turaqty turýǵa ótinish berý quqyǵyna ıe bolady. 2028 jyly bul kórsetkish sharyqtaý shegine jetip, 450 myń adam bolady. Bul degenińiz sońǵy jyldarǵy ortasha kórsetkishtermen salystyrǵanda 4 ese kóp,- dep málimdedi mınıstr Shabana Mahmut.

Mahmut úkimet turaqty turýǵa yqtııarhat alýshylar úshin jańa talaptar engizýdi josparlap otyrǵanyn jarııalady. Olardyń qylmysqa qatysy joq, aǵylshyn tilin jetik bilýi, ulttyq saqtandyrý jarnalary turaqty bolýy kerek jáne qaryzy bolmaýy tıis.

Ótinish berýshi Ulybrıtanııada qalý úshin osy talaptardyń árqaısysyna qanshalyqty sáıkes bolýyna baılanysty 10 jyldyq merzim qysqartylýy múmkin.

Mysaly, joǵary stavka boıynsha salyq tóleıtinder úshin ol úsh jylǵa deıin qysqartylýy múmkin. Bul jahandyq daryndar jelisi boıynsha qujat tapsyratyndar úshin de qoıylatyn talap.

Ótinish berýshi úshin qaıyrymdylyq uıymdarynda jumys isteý – artyqshylyq, al memlekettik járdemaqy alý kemshilik bolar edi. Sońǵy faktor jaǵdaıdy ásirese aýyrlatady, sebebi ótinish berýshi zańsyz kelgen mıgranttar sııaqty ótinish berý merzimin 20 jyl kútýi múmkin.

Buǵan deıin Ulybrıtanııada bosqyn mártebesin berý saıasatyn qatańdatýdy josparlap otyrǵanyn jazǵan bolatynbyz.