Uly dala men Uly Qytaı arasyndaǵy rýhanı-mádenı baılanys eshqashan úzilgen emes — Prezıdent
ASTANA. KAZINFORM – Qasym-Jomart Toqaevtyń aıtýynsha, sapar barysynda Qytaı tarapy qazaq delegatsııasyna erekshe kóńil bólip, ystyq yqylasy men qonaqjaılyǵyn kórsetti. Bul týraly Aqordanyń baspasóz qyzmeti habarlady.
— Resmı saparym oıdaǵydaı, tabysty ótti dep sanaımyn. Biz Tóraǵa Sı Tszınpın myrzamen mazmundy jáne óte tıimdi kelissózder júrgizdik. Biz qos eldiń ár saladaǵy yntymaqtastyǵy boıynsha ortaq kelisimge keldik. Qazaqstan men Qytaı arasyndaǵy qarym-qatynastyń bolashaǵy jarqyn bolatynyna zor senim bildirdik, — dedi Prezıdent.
Memleket basshysy qazirgi tańda Qazaqstan ekonomıkasy jaqsy qarqynmen ósip kele jatqanyn aıtty.
— Biz iri ekonomıkalyq jobalardy júzege asyryp jatyrmyz. Bıyl jalpy ishki ónimdi 300 mıllıard dollarǵa jetkizýdi kózdep otyrmyz. Kólik-logıstıka, aýyl sharýashylyǵy, energetıka, óńdeý ónerkásibi, jasandy ıntellekt salalaryna basymdyq beremiz. Osy aýqymdy mindetterdi oryndaý úshin biz Qytaı elimen yqpaldastyqty damytýǵa múddelimiz. Uly dala men Uly Qytaı arasyndaǵy rýhanı-mádenı baılanys eshqashan úzilgen emes. Ony jalǵastyra berý — asa mańyzdy mindet. Ulttyq mádenıet ortalyǵy bul iste aıryqsha ról atqarady dep oılaımyn. Munda halqymyzdyń baı murasy men salt-dástúri nasıhattalady. Sondaı-aq osy jerde eki eldiń jastary ozyq bilim ıgerý, jasampaz ıdeıalarymen almasý úshin kezdesip turady, — dedi Prezıdent.
Memleket basshysynyń pikirinshe, rýhanııat — ár halyqtyń dúnıetanymy, bolmysy, ishki áleminiń kórinisi. Sondyqtan tól mádenıetimizdi dáripteıtin bul rýhanı orda qazaq pen qytaıdyń ózara qurmeti men tatýlyǵyn arttyra túseri sózsiz.
— Qytaıda ejelden aıtylatyn naqyl sóz bar: «Jalǵyz ashqan gúl kóktem bolmaıdy, kóktem barlyq gúlder qulpyrǵanda keledi». Ár alýan mádenıet, ıdeıa jáne órkenıet tek ózara almasý men úılesimdi ómir súrý arqyly adamzat qoǵamyn órkendetedi jáne damytady. Búgin Beıjińde Qazaq mádenı ortalyǵynyń ashylýy — osy uǵymdardyń jarqyn kórinisi, — dedi Prezıdent.
Aıta ketelik Memleket basshysy Qytaıdaǵy Qazaqstan mádenıet ortalyǵynyń ashylý rásimine qatysty.