Ulandyqtar sý tasqynyna qarsy is-sharalarǵa belsendi qatysyp jatyr

ASTANA. KAZINFORM —  ІІM Ulttyq ulany kóktemgi sý tasqynynyń saldaryn joıýǵa jáne oǵan qarsy is-sharalardy júrgizýge belsendi qatysyp jatyr. 

Petropavl qalasynda «Ortalyq» óńirlik qolbasshylyǵynyń 6637 áskerı bóliminiń 60-qa jýyq áskerı qyzmetshisi naýryz aıynyń basynan beri Teplıchnoe aýylyna jumyldyryldy. Olar 7 000-nan astam qum salynǵan qaptardy daıyndap, eldi mekendi sý tasqynynan qorǵaý úshin jasandy qorshaýlar saldy.

— Budan bólek Qostanaıda ornalasqan 6697 áskerı bóliminiń 100-ge jýyq áskerı qyzmetshisi Arqalyq, Torǵaı aýdandaryndaǵy jáne Aqkól aýylyndaǵy sý tasqynynyń saldaryn joıýǵa kómektesip jatyr. Olar qazirdiń ózinde ınertti materıaldar salynǵan 10 000-nan astam qappen sýdan qorǵaıtyn tosqaýyldar jasady, — delingen habarlamada.

Sondaı-aq 5546 áskerı bóliminiń 60 áskerı qyzmetshisi jáne oblystyq tótenshe jaǵdaılar departamentiniń 34 mamany Qyzylqoǵa aýdanynyń Mııaly aýylynda jaǵalaýdy nyǵaıtý jumystaryn úzdiksiz júrgizip jatyr. Negizgi mindet — ózenniń arnadan tasýyn boldyrmaý jáne sý basý qaýpin barynsha azaıtý.
Áskerı qyzmetshiler men TJM qyzmetkerleri ózenniń tasýyn boldyrmaý úshin aýdan shetindegi kópir bógetterin belsendi túrde nyǵaıtyp jatyr.

Jumys eki aýysymmen júrgiziledi: bir top qaptardy qummen toltyrsa, ekinshisi jaǵalaý jıegin nyǵaıtady. Qazirgi ýaqytta 6 500 qap toltyrylyp, sý basýdyń aldyn alý boıynsha is-sharalar júrgizildi. Barlyq jumys jergilikti bılik organdary men quzyretti qyzmetterdiń qatań baqylaýynda.

Aıta ketelik Ulttyq ulan kýrsanttary SQO-da qum salynǵan 3 myń qap daıyndaǵan edi.