Ul-qyzymnyń toıynda arbada otyrmaýym kerek dep sheshtim - Tartyl Fest-tiń erekshe qatysýshysy Azamat Nurálıev
Tartyl Fest týrnıriniń grand-fınalynda jyl boıy ótken óńirlik týrnırlerde erekshe ónerimen este qalǵan aıryqsha atletter konkýrstan tys óner kórsetti. Solardyń biri – Almaty oblysy Qarasaı aýdany Qarǵaly aýylynyń turǵyny Azamat Nurálıev.
Azamat bul saıysqa synyptas dosynyń qamshylaýymen qatysqanyn aıtady.
«1-synypta oqyp júrgen kezimnen bastap týrnıkke áýespin. Tartyl Fest týraly tanystarymnan estidim. Jumystan kelip demalǵaly jatqanymda synyptas dosym qońyraý shaldy. «Sen Tartyl Fest-ke ótinim berdiń be?» - dep surady birden. Almatydaǵy týrnırge qatysýǵa kesh qalǵan ekenmin. Aqyry 500 shaqyrym jerdegi Tarazda ótetin týrnırge tirkeldim. Ómirde de, sportta da qoldaýshy – jubaıym. Sonyń qoldaýymen Tarazǵa tarttyq. Ol jaqta 3-oryn alǵanmyn. Búgin qudaı buıyryp, Astanaǵa kelip otyrmyn», - deıdi sportshy.
Qazir Azamat qol kúresine túbegeıli bet burǵan. Alǵashynda birneshe sport túrinen baby men baǵyn synap kóript. Grant-fınalda ol beltemirge 33 ret tartylyp, kórermen qoshemetine bólendi.
«Negizgi sportym – qol kúresi. Buǵan deıin Qazaqstannyń, Azııanyń chempıony atanǵanmyn. Bıyl Antalııada Álem chemıpony boldym. Osy kúnime qýanyp turmyn. Úıde jatpaı, sportty serik etkenimniń arqasynda búgin Astanaǵa kelip jatyrmyn», - dedi ol.
Áńgime arasynda Azamat arbaǵa qalaı tańylǵanyn eske aldy.
«Ol kún áli esimde. 2014 jyldyń 13 qarashasy bolatyn. Ottegi ballony jarylyp, aıaqtan aıyryldym. Bir qolymnyń saýsaqtaryna da zaqym keldi. Aıaq-qolymnyń saý kúninde de sportqa jýyq bolǵanymdy aıttym ǵoı. Keıin sportqa bet burýyma sol ádettiń kóp kómegi tıdi. Oqys oqıǵadan keıin 3 jyldaı úıde jatyp qaldym. Kúızeliske de tústim. Ózimniń eki ul, eki qyzym bar. Balanyń bári ákege qarap ósedi ǵoı. 2017 jyl ómirdi túbegeıli ózgertti. «Ul-qyzdarym ósedi. Solardy úılendirgen kezde ákeleri arbada otyrmaý kerek» degen sheshimge keldim. Osy oı qamshylap, sportqa qaıta bet burdym.
Áýeli júzý men tennıste júrdim. Múmkindigi shekteýli jandar aınalysatyn sport túrleri az ǵoı jalpy. Júzýden óz sanatym boıynsha Qazaqstan chemıpony bolyp ta úlgergemnmin. Keıin belgili bir sebeptermen ol sport túrlerimen shuǵyldana almaıtyn boldym. Qol kúresine osylaı keldim. Bıyl sonyń da jemisin kórip jatyrmyz. Jastarǵa aıtarym, sportpen shuǵyldansyn. Sport adamdy kez kelgen qıyndyqtan alyp shyǵady», - deıdi Azamat Nurálıev.
Buǵan deıin habarlaǵanymyzdaı, qazir elordadaǵy Kongress ortalyqta Tartyl Fest respýblıkalyq týrnıriniń grand-fınaly ótip jatyr.
Eske salsaq, QR Prezıdenti janyndaǵy «DARA» talanttardy qoldaý qorynyń bastamasymen uıymdastyrylǵan týrnırdiń aqtyq synyna óńirlik irikteý jarystarynda úzdik nátıje kórsetken 170 sportshy qatysady. Qatysýshylardyń jasy – 11-51 jas aralyǵynda.
Týrnıkke tartylý jarysy byltyr Qazaqstannyń 20 qalasynda ótti. Onda 7 myńnan astam qazaqstandyq 9 salmaq dárejesinde saıysqa túsip, 33 jastaǵy tarazdyq Evgenıı Nam 50 ret kórsetkishpen týrnır rekordyn ornatqan.
EXPO aýmaǵyndaǵy Kongress ortalyqta ótip jatqan grand-fınaldan «Jibek Joly» telearnasy tikeleı kórsetilim taratady.
Grand-fınaldyń jalpy júlde qory – 54 mln teńge. Óz salmaq dárejesi boıynsha 1-oryn alǵan jeńimpazdarǵa 3 mln teńge, 2-oryn alǵandarǵa 2 mln teńge, 3-oryn ıelengenderge 1 mln teńge syıaqy beriledi.
Bul grand-fınalda chempıon atanǵandar Street Workout boıynsha álem chempıonatynda Qazaqstan atynan saıysqa túse alady.
