UQShU sessııasynda prezıdentter qandaı máselelerdi talqylady
ASTANA. KAZINFORM – Memleket basshysy Qasym-Jomart Toqaev Elordada Ujymdyq Qaýipsizdik týraly shart uıymy Ujymdyq qaýipsizdik keńesi sessııasynyń otyrysynda qandaı máselelerdi talqylaǵanyn aıtty.
«Jańa ǵana otyrysqa qatysýshylar shaǵyn qurammen halyqaralyq jáne óńirlik qaýipsizdiktiń ózekti máseleleri týraly jan-jaqty pikir almasty. Bıyl Qazaqstannyń tóraǵalyǵymen UQShU qyzmetiniń negizgi qorytyndylary talqylandy. Kezdesý qorytyndysy bizdiń ujymdyq qaýipsizdikke tónýi múmkin syn-táýekelder men qaýip-qaterdiń aldyn alý úshin birlesip áreket etýge daıyn ekendigimizdi taǵy da rastady», - dedi Prezıdent Ujymdyq qaýipsizdik keńesiniń keńeıtilgen quramyndaǵy otyrysynda.
Memleket basshysynyń aıtýynsha, keńes músheleri talqylaý kezinde halyqaralyq kún tártibindegi ózekti máseleler boıynsha ustanymdardy pysyqtaǵan.
«Bizdiń qazirgi ahýaldy jalpy baǵalaýymyz jáne UQShU-nyń odan ári damýy týraly paıymymyz Qazaqstannyń bastamasy boıynsha ázirlengen Ujymdyq Qaýipsizdik Keńesiniń deklaratsııasynda kórsetilgen», - dedi Qasym-Jomart Toqaev.
Prezıdent búgingi basqosýda ekinshi dúnıejúzilik soǵystyń aıaqtalǵanyna 80 jyl tolýyn atap ótý máselesine erekshe nazar aýdarylǵanyn aıtty.