Ýkraına Irandaǵy áýe apatynyń barynsha ashyq tergelýin talap etpek
«Sózsiz, tergeýdiń barynsha jarııa túrde júrgizilýin talap etemiz. Osy tergeýge senimdi arttyratyn nemese qamtamasyz etetin barlyq halyqaralyq uıymdar tartylýy tıis», - dedi Goncharýk.
Sondaı-aq, ol áýe apatynyń sebebi resmı túrde jarııalanǵanǵa deıin aıtylǵan qandaı da bir nusqalardy manıpýlıatsııa dep atady.
«Qazir qaýeset taratpaı-aq qoıaıyq. Tergeýdi kóptegen toptar birlesip júrgizedi. Irannyń ishinde osy memlekettiń resmı organdary jumys isteıdi. Biz de Iran aýmaǵyndaǵy tergeýge qosylý úshin qajetti ótinishter berdik. Tergeý oqıǵa bolǵan jerde júrýi qajet», - dedi Goncharýk.
Prezıdent Vladımır Zelenskııdiń tapsyrmasy boıynsha Ýkraınada da qylmystyq is qozǵalǵan. Onyń barysynda barlyq qajetti qaýipsizdik sharalary qolǵa alynǵany, ne alynbaǵany anyqtalatyn bolady.
«Degenmen, atalmysh tergeýdi júrgizýdiń konfıgýratsııasy týraly resmı túrde keıinirek habarlaımyz dep oılaımyn. Qazir úshinshi tarappen – Iranmen konsýltatsııalar, resmı protsedýralar júrip jatyr», - dedi Ýkraına premer-mınıstri.
Budan bólek, Ýkraına Ulttyq qaýipsizdik jáne qorǵanys keńesiniń hatshysy Alekseı Danılov tergeý júrgizilgenge deıin áýe apatynan qaza tapqan azamattardyń elderi mindetti túrde tartylatynyn atap ótti.
«Budan bólek, ushaqty shyǵarǵan Boeing kompanııasynyń mamandary da komıssııa jumysyna jumyldyrylady», - dedi Danılov.
Eske salaıyq, sársenbi, 8 qańtarda Tegeran ýaqytymen 6:00-de Imam Homeını atyndaǵy áýejaıdan Tegeran-Kıev baǵytymen ushqan «Ýkraına halyqaralyq áýe jelileri» áýe kompanııasynyń Boeing-737 ushaǵy apatqa ushyraǵan edi.
Ushaq bortynda 177 adam bolǵan: 168 jolaýshy men 9 ekıpaj múshesi. Onyń ishinde Irannyń – 82, Kanadanyń - 63, Ýkraınanyń - 2 + 9 (ekıpaj), Shvetsııanyń – 10, Aýǵanstannyń – 4, GFR-dyń – 3, Ulybrıtanııanyń 3 azamaty bolǵan. Olardyń barlyǵy qaza tapty.
