20:34, 09 Qyrkúıek 2016 | GMT +5
UKP fermerler úshin 700-den astam semınar ótkizbek
ASTANA. QazAqparat - Qazaqstandyq fermerlerdi aýyl sharýashylyǵy salasyndaǵy aldyńǵy qatarly texnologııalarǵa oqytatyn bolady. Bul týraly "Atameken" Ulttyq kásipkerler palatasy agroónerkásiptik keshen jáne tamaq ónerkásibi departamenti dırektorynyń orynbasary Dinmuxamed Ábsattarov málim etti.
"Ulttyq kásipkerler palatasynda Agrarlyq quzyrlylyq ortalyǵy quryldy. Onda qazir 50-den astam otandyq jáne shetel sarapshylary jumys isteýde. 2016 jyly biz AÓK-niń 25 basym salasy boıynsha 10 myń tyńdarman úshin 700-den asa semınar ótkizýdi josparlap otyrmyz. Qazirgi ýaqytta biz shamamen 400 semınar ótkizdik", - dep atap ótti D. Ábsattarov.
Onyń aıtýynsha, aımaqtarda oqytý jumystary 11 shildede bastalǵan. Qazirgi ýaqytta 5 766 adam oqytyldy.
Mamannyń sózi boıynsha, Qazaqstannyń agroónerkásiptik kesheniniń damýyna fermerler men osy saladaǵy adamdardyń biliktilik deńgeıiniń tómendigi ájepteýir tejeý bolyp otyr. Olardyń basym bóligi arnaıy bilim men tájirıbege ıe emes. Jańa texnologııalardy ıgerýge shorqaq.