Úkimette azyq-túlik baǵacyn turaqtandyrý máselesi qaraldy
ASTANA. KAZINFORM – Premer-mınıstrdiń orynbasary – ulttyq ekonomıka mınıstri Serik Jumanǵarınniń tóraǵalyq etýimen ınflıatsııany turaqtandyrý jónindegi kezekti keńeste negizgi azyq-túlik jáne azyq-túlik emes taýarlar baǵasyna qatysty jaǵdaı talqylandy.
Qarasha aıynda qazanmen salystyrǵanda azyq-túlik emes taýarlar baǵasynyń ósimi 0,9%-ǵa deıin baıaýlady, al azyq-túlik ónimderiniń baǵasy ótken aı deńgeıinde (1%) saqtaldy. Áleýmettik mańyzy bar azyq-túlik taýarlaryna arnalǵan baǵa ındeksi sońǵy tórt apta boıy ózgerissiz qalyp otyr.
Serik Jumanǵarın jylyjaı kókónisteriniń, ásirese qııar men qyzanaqtyń maýsymdyq qymbattaýyn eskere otyryp, shekaradaǵy ótkizý beketterinde túrikmen kókónisterine shuǵyl túrde «jasyl dálizder» uıymdastyrýdy tapsyrdy. Bul shara ásirese jylyjaı óndirisi jetkiliksiz aımaqtardy qoljetimdi baǵadaǵy kókónistermen turaqty qamtamasyz etýge baǵyttalǵan.
Jańa jyl merekeleri qarsańynda, 22-31 jeltoqsan aralyǵynda, eldegi sýpermarketterde «Bereke fest» aktsııasy bastalady. Aktsııa aıasynda fermerlerden tikeleı jetkizilgen áleýmettik mańyzy bar taýarlar tómendetilgen baǵamen satylady. Sonymen qatar óńirlerde aýyl sharýashylyǵy jáne jańa jyldyq jármeńkelerdiń sany artady: jeltoqsan aıynda elimizdiń barlyq óńirinde 800-den astam jármeńke ótkizilmek. Tek ótken aptada 149 jármeńke uıymdastyryldy. Saýda komıtetine shalǵaı aýdandarǵa, onyń ishinde Mańǵystaý, Ulytaý oblystaryna taýar jetkizý boıynsha kómek kórsetý tapsyryldy.
Sondaı-aq Ulytaý oblysyndaǵy kúrdeli logıstıkany jáne áleýmettik mańyzy bar azyq-túlik taýarlaryn saqtaýǵa arnalǵan qoıma oryndarynyń tapshylyǵyn eskere otyryp, Serik Jumanǵarın óńirde logıstıkalyq ortalyq qurý mindetin qoıdy. Atalǵan ortalyqtyń qýaty azyq-túliktiń qajetti qoryn saqtaýǵa, logıstıkalyq shyǵyndardy qysqartýǵa jáne óńirlik taratý habyn qalyptastyrýǵa múmkindik beredi.
Aýyl sharýashylyǵy vıtse-mınıstri Ermek Kenjehanuly áleýmettik mańyzy bar azyq-túlik taýarlary baǵasyn turaqtandyrý tetikteri boıynsha qoldanystaǵy erejelerge tolyqtyrýlar engizý jumystary týraly baıandady.
Ózgerister onlaın monıtorıng júıesin ornatýdy mindetteıdi. Qazirgi ýaqytta «Qazaqtelekom» AQ Qyzylordada 3 myń sharshy metrlik qoımada pılottyq jobany júzege asyryp jatyr. Kelesi jyly barlyq áleýmettik kásipkerlik korporatsııalar qoımalary osyndaı júıelermen jabdyqtalyp, bul áleýmettik mańyzy bar azyq-túlik taýarlary qorlarynyń bolýyna, saqtaý jaǵdaılary men sapasyn naqty ýaqyt rejıminde baqylaýǵa múmkindik beredi. Ózgerister jaqyn arada kúshine enedi dep kútilip otyr.
Eske sala keteıik, buǵan deıin BQO-da azyq-túlik baǵasyn negizsiz kótergen 177 kásipker jaýapqa tartylǵanyn jazǵanbyz.