Úkimette aýyl halqynyń densaýlyǵyn jaqsartýǵa baǵyttalǵan joba nátıjesi qaralady
ASTANA. KAZINFORM — Búgin saǵat 10:00–de Úkimettiń kezekti otyrysy ótedi. Onda Mınıstrler kabınetiniń músheleri 2 máseleni talqyǵa salýdy kózdep otyr.
Naqtyraq aıtqanda, Úkimet otyrysynyń kún tártibine myna máseleler shyǵarylady:
- «Aýylda densaýlyq saqtaýdy jańǵyrtý» ulttyq jobasynyń iske asyrylý barysy
- Qurylys salasyn tsıfrlandyrý jáne qala qurylysy kadastry.
Birinshi másele boıynsha Densaýlyq saqtaý mınıstri Aqmaral Álnazarova negizgi baıandama jasaıdy.
Aqmaral Sháripbaıqyzy aýyldyq eldi mekenderde medıtsınalyq-sanıtarııalyq alǵashqy kómek kórsetý uıymdary nysandaryn salý barysy jaıly jan-jaqty esep berip, óńirlerdi tapshy mamandarmen qamtamasyz etý jáne áleýmettik qoldaý máselesine toqtalady. «Altyn ýaqyt» qaǵıdaty boıynsha shuǵyl medıtsınalyq kómek kórsetý maqsatynda barlyq kópbeıindi ortalyq aýdandyq aýrýhanalar joǵary tehnologııalyq medıtsınalyq tehnıkamen qamtamasyz etiletinin atap ótedi.
Aýyl turǵyndary úshin medıtsınalyq kómekti jaqsartý jobasy aıasynda aýrýlardy erte anyqtaý maqsatynda búırektiń, asqazan-ishek joldarynyń, tynys alý aǵzalarynyń, qýyqasty obyrynyń keńeıtilgen skrınıngi engizildi. Shalǵaıdaǵy aýyldar men stantsııalardyń turǵyndary jyljymaly medıtsınalyq keshenderdiń qyzmetterin paıdalana aldy. Olar mamandardyń 1,4 mln konsýltatsııasyn aldy, 107 myń naýqas anyqtaldy. Dárilik zattar men medıtsınalyq buıymdardyń qoljetimdiligin qamtamasyz etý úshin bastaýysh medıtsınalyq uıymdardyń bazasynda 72 dárihana pýnkti jáne aýylda 161 jeke dárihana ashyldy. Densaýlyq saqtaý uıymdary jelisiniń memlekettik normatıvi qaıta qaraldy. Sonyń arqasynda 50 adamǵa deıingi aýyldyq eldi mekender bir medıtsına qyzmetkerimen qamtamasyz etildi, turǵyndardyń sany 500 adamnan asatyn aýyldarda medıtsınalyq personal sany úsh birlikke deıin ulǵaıdy.
Al Ónerkásip jáne qurylys vıtse-mınıstri Qýandyq Qajkenov qurylys salasyndaǵy biryńǵaı tsıfrlyq ekojúıeniń qalyptasýyna jáne sapasy men ashyqtyǵyn arttyrýǵa septigin tıgizetin sharalarǵa toqtalady. Onyń ishinde qurylys aınalymynyń ómirlik tsıkli kezeńderin qamtıtyn biryńǵaı portal qurýǵa, qala qurylysy qyzmetiniń ashyqtyǵyn, qala jobalaryn ázirleý men iske asyrýdyń sáıkestigin qamtamasyz etý maqsatynda nysannyń biregeı nómirin engizýge, E-Qurylys múmkindigine qatysty jaıttar sóz bolady.
Esterińizde bolsa, ótken jyldyń 7 aqpanynda ótken Úkimettiń keńeıtilgen otyrysynda Memleket basshysy Qasym-Jomart Toqaev elimizdi ekonomıkalyq-áleýmettik damytý isinde mańyzdy ról atqaratyn qurylys salasynyń tıimsiz basqarylýy óte ózekti másele bolyp turǵanyna nazar aýdartqan edi.
— Qazir qurylys salasynda birneshe aqparattyq júıe bar. Osyndaı tásilder arqyly bólingen qarajattyń maqsatqa saı jumsalýyn qamtamasyz etý qajet, ıaǵnı barynsha ashyq jáne qatań baqylaý bolýǵa tıis. Bul — óte mańyzdy másele. Sebebi qarjynyń urlanýy, eń aldymen, qurylystyń sapasyna áser etedi jáne bıýdjetke qosymsha salmaq salady. Aqshaǵa tsıfrlyq teńge arqyly en salý jáne ony qadaǵalaý, basqasha aıtqanda, «aqshany boıaý» bıýdjet qarajatynyń jumsalýyn baqylaıtyn óte mańyzdy tetik bolýy múmkin. Búginde tsıfrlyq valıýtany qoldanýǵa qatysty pılottyq jobalar tıimdi júzege asyrylyp jatyr. Sybaılas jemqorlyqqa qarsy is-qımyl agenttigine Úkimetpen jáne Ulttyq bankpen birlesip, osyndaı jobalardyń aýqymyn keńeıtýdi, onyń ishinde qurylys salasyna barynsha engizýdi tapsyramyn, — degen edi Prezıdent.
Otyrys bitkennen keıin baspasóz máslıhaty ótkiziledi. Onda Densaýlyq saqtaý mınıstri Aqmaral Álnazarova men Ónerkásip jáne qurylys vıtse-mınıstri Qýandyq Qajkenov BAQ ókilderiniń saýaldaryna jaýap beredi.
Úkimet otyrysynyń tikeleı taratylymyn PrimeMinister.kz saıtynan, YouTube resmı arnasynan, Facebook áleýmettik jelisinen, sondaı-aq UKIMET Telegram-kanalynan kórýge bolady.
Baspasóz konferentsııasynyń tikeleı taratylymy YouTube resmı arnasy men Facebook áleýmettik jelisinen kórsetiledi.
Aıta keteıik, ótken aptadaǵy Úkimet otyrysynda gaz salasyn damytý men tsıfrlandyrý máseleleri men ıÝNESKO aıasynda mádenı murany saqtaý jáne ilgeriletý sharalary qaralǵan. Onda Energetıka mınıstri Erlan Aqkenjenov iri ınfraqurylymdyq jobalar men gaz esepteý júıelerin tsıfrlandyrý barysyna toqtaldy. Osy oraıda Premer-mınıstr Oljas Bektenov Qazaqstan óziniń gaz qoryn tıimdi ıgerý úshin tıisti mınıstrlikter júıeli jumys istep, uzaq merzimdi strategııa qura bilýi kerektigin basa aıtty.
— Bizdiń elimizdiń «kógildir otyn» boıynsha áleýeti zor. Tabıǵı gaz qorynyń rastalǵan kólemi shamamen 4 trıllıon tekshe metr. Alaıda, ony ıgerý úshin júıeli tásilder men jańa ınvestıtsııalar, zamanaýı ınfraqurylym jáne uzaqmerzimdi strategııa qajet, — dedi ol.
Al Mádenıet jáne aqparat mınıstri Aıda Balaeva elimizdiń tarıhı-mádenı murasyn zamanǵa saı jańǵyrtý jóninde Memleket basshysynyń Ulttyq quryltaıda bergen tapsyrmasy aıasynda istelip jatqan jumystar týraly baıandady.
Osy máselege qatysty Úkimet basshysy Oljas Bektenov Mádenıet mınıstrligine ıÝNESKO aıasynda mádenı murany saqtaý jáne ilgeriletý jónindegi aldaǵy kezeńge arnalǵan keshendi jospar jobasyn ázirlep, 1 qyrkúıekke deıin Úkimet qaraýyna engizýdi tapsyrdy. Sondaı-aq, Mádenıet mınıstrligi múddeli organdarmen jáne ákimdiktermen birlesip, tarıh jáne mádenıet eskertkishterine túgendeý júrgizip, bıylǵy 1 tamyzǵa deıin tıisti qujattardy ıÝNESKO-ǵa jiberýi qajet. Túrkistan, Jambyl, Almaty jáne Jetisý oblystarynyń ákimdikteri 15 qyrkúıekke deıin dúnıejúzilik mura obektileriniń aımaqtaryn memlekettik jer kadastrynyń aqparattyq júıesine engizýge tıis.
− Týrızm mınıstrligi Mádenıet mınıstrligimen birge mádenı mura obektileri men elementterin eskeretin týrıstik marshrýttardy ázirlep, iske qossyn. Sondaı-aq, Tsıfrlandyrý mınıstrligimen birlesip, ıÝNESKO tizimderine engizilgen obektiler men elementter boıynsha tsıfrlyq tanymdyq ónimder jasaýy qajet, − dedi Oljas Bektenov.
Aıta ketelik keshe Qanat Bozymbaev «Energetıka jáne kommýnaldyq sektorlardy jańǵyrtý» Ulttyq jobasyn júzege asyrý barysyn teksergen edi.