Úkimet Jasandy ıntellektini damytý strategııasyn jáne Tsıfrlyq kodeksti ázirlep jatyr – Prezıdent
ASTANA. KAZINFORM – Memleket basshysy Qasym-Jomart Toqaev Aqordada ótip jatqan Ǵylym jáne tehnologııalar jónindegi ulttyq keńestiń otyrysynda jasandy ıntellektini elimizde damytý máselesine erekshe toqtaldy.
«ÚShІNShІ. Jasandy ıntellektini jedel damytý qajet. Ǵylymı-tehnıkalyq progress jahandyq ekonomıkanyń sıpaty men adamdardyń turmys saltynyń jyldam ózgerýine yqpal etip otyr. Kúni keshe ǵana qııal-ǵajaıyp bolyp kóringen tehnologııalar búgin shyndyqqa aınalýda. Mundaı jaǵdaıda elimizdiń tehnologııalyq jáne ǵylymı-ınnovatsııalyq derbestigin nyǵaıtý úshin bizge barlyq múmkindikti paıdalaný mańyzdy. Jasandy ıntellektini damytýdyń perspektıvasy zor. Keıbir baǵalaýlar boıynsha jasandy ıntellekt 2030 jylǵa qaraı álemdik JІÓ-niń 7 paıyzyn qamtamasyz etedi. Al 2027 jylǵa qaraı jahandyq jasandy ıntellekt naryǵynyń kapıtalızatsııasy 400 mıllıard dollardan asady. Búkil álemde jasandy ıntellekt adam eńbegin almastyryp jatyr. Medıtsınalyq dıagnostıka jáne zańgerlik keńes berý sııaqty kúrdeli salalarda da keńinen qoldanyla bastady. Tipti, neırojeliler sýret salyp, mýzyka, óleń jazady», - dedi Qasym-Jomart Toqaev.
Prezıdent sondaı-aq elimizde jasandy ıntellektini damytatyn ınstıtýttardyń qajet ekenin, búgingi tańda Úkimet Jasandy ıntellektini damytý strategııasyn jáne Tsıfrlyq kodeksti ázirlep jatqanyn tilge tıek etti.
«Elimizde jasandy ıntellekt qaýipsizdik júıesi, medıtsına, bank qyzmeti, logıstıka, bilim berý salalaryna oıdaǵydaı engizilip jatyr. Osy tehnologııany meńgergen myqty kompanııalar da paıda boldy. Soǵan qaramastan, jasandy ıntellekt ındýstrııasyn odan ári damytý úshin memleket keshendi qoldaý kórsetýi kerek. Málimetter men tehnologııalyq ınfraqurylym barynsha qoljetimdi bolýy kerek. Sondyqtan qolaıly ekojúıe qalyptastyrý qajet. Sonymen qatar bizge jasandy ıntellektini damytatyn tıisti ınstıtýttar kerek. Qazir Úkimet Jasandy ıntellektini damytý strategııasyn jáne Tsıfrlyq kodeksti ázirlep jatyr. Bul qujattar atalǵan saladaǵy zertteý jumystaryna jáne ázirlemelerdi is júzinde qoldanýǵa jaǵdaı jasaýy kerek. Sondaı-aq bıznes pen joǵary oqý oryndary úshin tehnologııalyq ınfraqurylymdar men málimetter bazasyn qoljetimdi etýge tıis. Jasandy ıntellektini adamzat ıgiligine qyzmet etý úshin damytý mańyzdy. Sondyqtan etıkalyq standarttardy belgileý, málimetterdi qorǵaý jáne osy saladaǵy kıberqaýiptiń aldyn alý isine erekshe mán bergen jón», - dedi Memleket basshysy.
Óz kezeginde Prezıdent memlekettik organdar men olarǵa baǵynyshty uıymdardyń derekter qoryn ıntegratsııalaýmen belsendi aınalysýy tıis ekenin aıtty.
«Jasandy ıntellektini retteý máselesi búginde ulttyq jáne jahandyq deńgeıde jıi talqylanady. Mysaly, jaqynda EýroOdaqta (Artificial Intelligence Act) tıisti zań qabyldandy. Tsıfrlyq dáýir jańa aktıvtiń, ıaǵnı, derekterdiń paıda bolýyna yqpal etti. Olar jasandy ıntellekt pen mashınalyq úırenýdiń negizgi shıkizaty sanalady. Sondyqtan memlekettik organdar men olarǵa baǵynyshty uıymdardyń derekter qoryn ıntegratsııalaýmen belsendi aınalysý kerek. Kúrdeli ǵylymı mindetterdi sheshý jáne qoldanbaly jobalardy júzege asyrý úshin jaqyn arada elimizde jasalyp, iske qosylatyn sýperkompıýterlerdiń múmkindigin barynsha jumyldyrý qajet», - dedi Qasym-Jomart Toqaev.
Eske sala keteıik, buǵan deıin Aqordada Prezıdent Qasym-Jomart Toqaevtyń tóraǵalyǵymen Ǵylym jáne tehnologııalar jónindegi ulttyq keńestiń otyrysy ótip jatqanyn jazǵan edik.
