Úkimet zańsyz áreketter arqyly paıda tabatyn qyzmet túrlerine ádil salyq salýdy kózdep otyr – vıtse-mınıstr

ASTANA. KAZINFORM - Búgin Jambyl oblysynda bıznes ókilderi men qoǵam qaıratkerleri QR Ulttyq ekonomıka vıtse-mınıstri Baýyrjan Qudaıbergenovpen kezdesti, dep habarlaıdy Úkimettiń baspasóz qyzmeti.

Салық реформасы
Фото: Үкімет

Kezdesýge 80-nen astam kásipkerlik qyzmet sýbektisi, sonyń ishinde túrli salalardaǵy shaǵyn, orta jáne iri bıznes ókili qatysty. 

Talqylaýdyń negizgi taqyryby kásipkerlerdi qoldaýǵa, salyq júıesiniń ashyqtyǵyn arttyrýǵa, salyqtyq ákimshilendirýdi jetildirýge baǵyttalǵan Salyq zańnamasyndaǵy aldaǵy ózgerister boldy.

Kezdesý barysynda vıtse-mınıstr Úkimet reforma aıasynda QQS-ny janama salyq retinde óz sıpatyna qaıtarýǵa umtylys bildirip otyrǵanyn atap ótti. QQS tóleýshiler qatarynyń artýy buryn QQS esepteı almaı otyrǵan kompanııalarǵa oń áser etedi, óıtkeni olar salyq tólemeıtin tulǵalarmen jumys istedi. Mundaı kásiporyndar úshin salyq bazasy qysqarady jáne olar QQS mólsherlemesiniń ósýin sezbeýi múmkin. Sonymen qatar salyq tóleýshiler aıasyn keńeıtý teń básekelestik jaǵdaı týǵyzady, bul bıznes úshin qolaıly jaǵdaı.

Alaıda, QQS sheginiń tómendetilýi shaǵyn kásipkerlerge býhgalterlik esep júrgizýdi mindetteıtindikten, bul úderisti jeńildetý úshin kassalyq ádisti engizý, sondaı-aq elektrondy shot-faktýralar men bank qosymshalary arqyly salyqtyq esepti avtomattandyrý qarastyrylyp otyr.

Úkimet qoǵamda salyq tóleýge oń kózqaras qalyptastyrý qajettigine nazar aýdaryp otyr. Atap aıtqanda, reformalar qosymsha qun týdyrmaıtyn, biraq eń aldymen tranzaktsııalyq qyzmet, qarajatty qaıta bólý nemese zańsyz áreketter arqyly paıda ákeletin qyzmet túrlerine ádil salyq salýǵa baǵyttalǵan.

Talqylaý barysynda Jambyl oblysynyń bıznes-qoǵamdastyǵy ókilderi aldaǵy salyqtyq ózgeristerge qatysty óz pikirlerin bildirdi.

«ÁýlıeAtaFenıks» JShS dırektory, Jambyl oblysy Kásipkerler palatasynyń Agroónerkásip kesheni jáne tamaq ónerkásibi óńirlik jáne salalyq keńesiniń tóraǵasy Farıda Júnisova aýyl sharýashylyǵy eldiń azyq-túlik qaýipsizdigin qamtamasyz etetin ekonomıkanyń negizgi salalarynyń biri ekenin atap ótti. Qazirgi sharýa qojalyqtary QQS tóleýden bosatylǵan, al agrarlyq sektordyń zańdy tulǵalary tıisti salyqtardyń tek 30%-yn ǵana tóleıdi. Prezıdent QQS boıynsha saralanǵan mólsherlemelerdi engizýdi jáne shekti 20%-dan tómen qoıýdy tapsyrdy. Osyǵan baılanysty bıznes-qoǵamdastyǵy aýyl sharýashylyǵy taýaryn óndirýshiler úshin QQS-ny tolyǵymen joıý ıdeıasyn qoldaıdy, bul qazaqstandyq taýarlardyń básekege qabilettiligine oń áserin tıgizedi.

Sondaı-aq orta kásipkerlik sýbektileri qyzmetkerleriniń sanyn 250-den 1 myń adamǵa deıin arttyrýdy jáne jalpy jyldyq kiristi 10 mln AEK-ke deıin kóterýdi usyndy.

«ÁýlıeAtaTransPass» JShS dırektory, Jambyl oblysy Kásipkerler palatasy Óńirlik keńesiniń múshesi, Kólik jáne logıstıka salalyq keńesiniń tóraǵasy Rashıd Pirmanov jolaýshylar tasymaly salasyna qatysty másele kóterdi. Ol áleýmettik mańyzy bar jolaýshy tasymalymen aınalysatyn kásiporyndar úshin QQS mólsherlemesin 0%-ǵa deıin tómendetý múmkindigin qarastyrýdy usyndy. Onyń aıtýyna qaraǵanda, bul qoǵamdyq kóliktiń qoljetimdiligin saqtaýǵa, memleket pen bıznestiń múddelerin teńestirýge yqpal etedi.

Onyń pikirinshe, QQS mólsherlemesin tómendetý, jańa avtobýstardy ákelý kezinde deldaldardy joıý kólik kompanııalarynyń qarjylyq jaǵdaıyn jaqsartady. Bul sharalar marshrýttardy qysqartýdyń aldyn alyp, jolaqy qunyn turaqty deńgeıde ustap turýǵa jáne avtobýs parkin jańartýǵa múmkindik beredi. Uzaqmerzimdi perspektıvada bul ózgerister jolaýshylar aǵynynyń artýyna, kásiporyndar kirisiniń 5%-dan 20%-ǵa deıin ósýine yqpal etip, qyzmet kórsetý sapasyn jaqsartady jáne jańa jumys oryndaryn ashady.

Kezdesý aıasynda qatysýshylar salyq saıasatyndaǵy ońtaıly sheshimderdi izdeý úshin memleket pen bıznes arasyndaǵy syndarly dıalogtiń mańyzdylyǵyn atap ótti. Reformalardyń ashyqtyǵy jáne kásipkerlerdiń pikirlerin esepke alý shaǵyn jáne orta bıznesti qoldaýdyń tıimdi tetikterin ázirleýge múmkindik beredi, bul óz kezeginde elimizdiń ekonomıkalyq damýyna oń áser etedi.

Esterińizge sala keteıik, Memleket basshysynyń tapsyrmasyna sáıkes, elimizdiń barlyq óńirlerinde bıznes ókilderimen kezdesýler ótip jatyr. Úkimet osy kezdesýler sheńberinde aıtylǵan usynystardy muqııat taldap, ári qaraı Parlamenttiń qaraýyna jáne zańnamalyq bastamalarǵa engizýge joldanatyn bolady.

Osyǵan deıin QR Premer-mınıstri Oljas Bektenov sarapshylarmen birge salyq reformasy men tsıfrlandyrý arqyly ákimshilendirý máselesin talqylaǵany týraly jazdyq.

 

Сейчас читают