Úkimet pen qoǵam: Juldyzshylar keler jyldy qalaı boljady

ASTANA. KAZINFORM – Astrologııalyq turǵydan alǵanda, 2026 jyl ótpeli kezeń, oǵan qosa álem men adamnyń eskiden arylyp, jańaǵa umtylatyn ýaqytqa aınalady. Sondyqtan birneshe kúnde memleket úshin de, qoǵam úshin de kúrdeli jolǵa túsetindeımiz. Osy rette Kazinform tilshisi Jańa jyl qarsańynda astrolog boljamyn taldap, ony Úkimet músheleriniń juldyznamasymen sabaqtastyryp kórdi.

Toqty

2026 jyl Toqtylarǵa qajyr -qaırat syılap, komandalyq damýǵa esik ashady.

Bul jylda kúsh-jigerin synalyp, al basty jetistik ózgelermen selbese jetken nátıjeden kórinbek. Toqtylarǵa ishki kúıin nazarǵa alý mańyzdy, sebebi 2026 jyl jaýapkershilik pen ósý mektebine aınalady.

— Maqtan úshin nemese aınalasyndaǵylarǵa bir nárseni dáleldeýge degen umtylyspen týyndaǵan qyzba sheshimnen aýlaq bolý kerek, — deıdi Astanadaǵy kásibı astrolog Irına Ábdiraıymova.

Astrologtardyń aıtýynsha, jyldyń ekinshi jartysy komandadaǵy toqtylarǵa jemisti bolady. Úshinshi toqsannan bastap olardyń energııasy tasyp, keıin yqpaldy adamdarmen joly túıisedi. Sonymen qatar, Toqtylar ómirin ózgertetin tanystardy ortaq jobalar, áleýmettik jeli, birlese istegen bastamalar arqyly tabady.

Aıta keteıik, Qarjy mınıstri Mádı Takıev (01.04.1978) pen Sý resýrstary jáne ırrıgatsııa mınıstri Nurjan Nurjigitov (31.03.1967) juldyznamasy Toqty.

Torpaq

Torpaqtar úshin 2026 jyl - turaqtylyq pen ishki kelisim jyly. Olar materıaldyq jaǵdaıǵa nazar aýdaratyn ýaqyt keledi.

Juldyznama Torpaqtardyń qarjylyq ahýaly jaqsarady dep otyr, alaıda ol úshin tabandy eńbek etip, jaýapkershilik alýdan qoryqpaý shart. Jeke qarym-qatynasta ózgeris joq emes: jaqyn janǵa kúmán artýy nemese kerisinshe, otbasyn nyǵaıtýǵa degen umtylys paıda bolady.

Jaz aılarynda Torpaq ózin baǵalaýdy úırenedi. Talantyn kórsetýge, jańa jobany júzege asyrýǵa, mańyzdy oqıǵalardyń ortasynan tabylýǵa ynta artady degen boljam bar.

— Negizgi keńes — baısaldy bolý jáne jaǵympazdyqqa boı aldyrmaý. Kúshin asyra baǵalaý jáne tym úlken mindetterdi moıynǵa alý qaýipti, óıtkeni jalǵyz jetistikke jetý qıyn, — dep boljady astrolog.

Torpaqtar úshin sáttilik málimdemeler arqyly emes, qajyrly eńbek pen kúshin baǵamdaý arqyly keledi. Barlyq qarbalas dúnıe olardy aınalyp ótip, ózi men jaqyndaryna kóńil bólýge múmkindik týady. Astrologtar Torpaqtarǵa bul múmkindikten aıyrylmaýǵa keńes beredi.

Juldyznamasy Torpaqqa tus kelgen mınıstrler kabınetiniń músheleri: Premer-Mınıstrdiń birinshi orynbasary Roman Sklıar (08.05.1971), Syrtqy ister mınıstri Ermek Kósherbaev (02.05.1965), Ǵylym jáne joǵary bilim mınıstri Saıasat Nurbek (18.05.1981), Energetıka mınıstri Erlan Aqkenjenov (01.05.1979), kólik mınıstri Nurlan Saýranbaev (20.05.1967).

Egizder

Egizder úshin 2026 jyl — qaıta qalyptasý men aýqymdy josparlar jyly. Jyl basy olarǵa ishki álemge nazar aýdarýǵa múmkindik beredi, demek shynaıy qalaýdy tabýǵa, demalýǵa, qorytyndy shyǵarýǵa, burynǵy isterdi aıaqtaýǵa tamasha kezeń. Osy kezeńdegi barlyq jetistik muqııat nazar salý arqyly, tynysh rejımde jumys isteý nátıjesinde qol jetpek.

Jyldyń ekinshi jartysynda Egizder jeńiske jetedi, tez kóteriledi. Olardyń qarym-qabiletin baıqaıtyndar kóbeıetin bolady. Sondaı-aq bul kezeń mahabbat, romantıka jáne shyǵarmashylyq úshin óte qolaıly.

— Ómirińizde qyzyqty adamdar paıda bolady, múmkindikterge kezigesiz. Bastysy, erkin bolýǵa umtylyńyz, Sonda sizdiń ıdeıańyz ben sózińiz salmaqtana túsedi. Ujymdaǵy eń mańyzdy adamǵa aınalar kún jaqyn, — dep keńes berdi Irına Ábdiraıymova.

2026 jyly Egizder úshin tabystyń kilti — tártip pen tabandylyq. Ideıa kóp, biraq nátıje tek júıeli áreketpen keledi. Jyl múmkindikter syılaıdy, alaıda olardy iske asyrý úshin ózgeriske daıyndyq pen sanaly eńbek qajet.

Úkimette juldyznamasy Egizder: Premer-mınıstrdiń orynbasary — jasandy ıntellekt jáne tsıfrlyq damý mınıstri Jaslan Mádıev (13.06.1983) jáne aýyl sharýashylyǵy mınıstri Aıdarbek Saparov (12.06.1966).

Shaıan

Shaıan belgisiniń ókilderi úshin 2026 jyl — ishki gúldený jyly. Jyldyń birinshi jartysy kúsh-qýatqa toly kezeń bolady. Qańtardan bastap jazdyń ortasyna deıin eń jaıly ýaqyt: senim artady, energııa tasyp, ishki úılesim týady. Shaıandar ıntýıtsııasyna senýi kerek — ishki daýys mańyzdy máselede durys sheshimdi nusqaıdy.

Jazdan keıin Shaıandar úshin jyldyń energııasy birqalypty bola túsedi. Bul quldyraý kezeńi emes, kerisinshe qol jetken jetistikti nyqtap bekitip, alǵa jyljıtyn ýaqyt ekeni anyq. Alaıda jaǵymdy. boljamǵa qaramastan, jyl barysynda mansap joly keri ketýi múmkin.

— Tabandylyq pen jaýapkershilikti talap etetin jaǵdaılar týyndaýy múmkin. Muny júrekke jaqyn qabyldamańyz, qaıta shyńdala túsińiz. Ásirese jumys barysynda asyǵys sheshimnen saq bolyńyz. Keıbir usynys pen adamdar kútkenińizdeı bolmaýy múmkin, sondyqtan aqparatty tekserip, senimdi derekkózge ǵana júginińiz, — dedi astrolog.

ıAǵnı 2026 jyly Shaıandar úshin ózin qalyptastyrý kerek. Olar qaýipsiz ári úılesimdi ortaǵa jaqyn júrse, jetistikke jetý ońaı.

Qoryta aıtsaq, Premer-mınıstrdiń orynbasary — Ulttyq ekonomıka mınıstri Serik Jumanǵarın (22.07.1969) jáne Premer-mınıstrdiń orynbasary — Mádenıet jáne aqparat mınıstri Aıda Balaeva (04.07.1974) osy belgige jatady.

Arystan

2026 jyl Arystandar úshin qozǵalysqa toly kezeń bolmaq. Bir jaǵynan, mansap pen qoǵamdyq ómirde qoldaý kúsheıse, ekinshi jaǵynan jeke jáne seriktestik qatynastarda synaqtar oryn alýy múmkin.

Jyldyń alǵashqy jartysy salystyrmaly túrde birqalypty ótedi. Bul ýaqytta arystandar buryn bastalǵan isterdi aıaqtap, jaǵdaıdy saralap, ashyq áreketten góri daıyndyq pen ishki jumysty tańdaǵany durys.

Al shildeden keıin naǵyz serpilis bastalady. Kúsh-qýat artyp, kásibı ósýge, jeke bastamalardy iske asyrýǵa jáne qoǵam aldynda tanylýǵa jol ashylady. Bul kezeń - batyl sheshim qabyldap, jańa deńgeıge shyǵýǵa qolaıly ýaqyt.

Alaıda tabysqa masaıramaı, qasyńyzda júrgen jandardyń úlesin umytpaǵan jón. Jyl boıy seriktestermen, básekelestermen qarym-qatynas erekshe nazardy talap etedi. Arandatýlar men kelispeýshilikter bolýy múmkin, sondyqtan mámilege jaqyn bolý tıimdi. Bıyl Arystandardyń basty kúshi — ashyq qarsylasýda emes, salmaqty sóz ben dıplomatııada.

Arystan belgisinde týǵandar qatarynda Úkimet músheleri de bar. Olardyń arasynda Ekologııa jáne tabıǵı resýrstar mınıstri Erlan Nysanbaev (11.08.1961) pen Ónerkásip jáne qurylys mınıstri Ersaıyn Naǵasbaev (28.07.1980) bar.

Bıkesh

Bıkeshter úshin 2026 jyl jańa múmkindikke toly. Jyl basynda jospar qurý, kelissóz júrgizý, oqý men ıdeıa usyný sátti júredi. Aıtylǵan sóz elenedi, bastamalar qoldaý tabady. Jazdan keıingi kezeń turaqty arnaǵa túsedi.

Sonymen birge jaýapkershilik artyp, jumysta qysym sezilýi múmkin. Qyzmet barysynda jańa tehnologııalardy tez meńgerýge týra keledi.

Bul jyly Bıkeshter úshin basty talap — ıkemdilik. Eski tásilderden arylyp, jaǵdaıǵa qaraı sheshim qabyldaý mańyzdy. Qosymsha mindetter alǵashynda aýyr kórinýi múmkin, biraq ol kásibı turǵyda ósýge jol ashady.

— Bıylǵy eń qajet qabilet — jaǵdaıǵa beıimdele bilý. Eski tásilderge jabysyp qalmaǵan jón. Tapqyrlyq tanytyp, qajet kezde standarttan tys sheshim qabyldaýǵa daıyn bolyńyz. Barlyǵyn túbegeıli ózgertýdiń qajeti joq. Bastysy, múmkindikterdi utymdy paıdalanyp, kez kelgen syn-qaterge ıkemdi jaýap berý, — dep atap ótti astrolog Bıkesh belgisiniń ókilderine.

Olardyń qatarynda týrızm jáne sport mınıstri Erbol Myrzabosynov (30.08.1984) pen oqý-aǵartý mınıstri Juldyz Súleımenova (25.08.1983) bar.

Tarazy

Keler jyl Tarazylar úshin ózgerister ákeledi. Bul jyl jańarý men synaqtan ótý kezeńi, biraq tabıǵı tepe-teńdikti saqtaý mańyzdy.

Jyldyń basynda qarjy men seriktestik máseleleri qıyndaıdy, biraq qajet sabaqtar beredi. Jaqyn jáne iskerlik baılanystar beriktikke synalady. Kúrdeli kelissózder, múddeler qaqtyǵysy nemese yntymaqtastyq sharttaryn qaıta qaraý jaǵdaılary kezdesýi múmkin. Mundaı kezde qıyn áńgimeni aınalyp ótpeı, dıplomatııalyq ustanym tanytý kerek. Ortaq resýrstardy, ınvestıtsııalardy basqarýda tártip saqtaý mańyzdy. Qaryzdardan aýlaq bolyńyz jáne barlyq qujatty muqııat tekserińiz.

Jyldyń ekinshi jartysynda jaǵdaı ózgeredi. Eńbekterińiz baǵalanady.

— Ózgerister kúrdeli kóringenimen, sońynda jaqsy nátıjege aparady. Romantıkalyq jáne shyǵarmashylyq isterde saq bolyńyz. Aqparatty tekserip, salqynqandylyq saqtańyz. Kenetten túsken usynystar men tanystyqtarǵa ashyq bolyńyz. Ashyqtyq sizge sáttilik ákeledi, — dep keńes beredi astrolog.

Qazaqstan Úkimetindegi bul belginiń ókili — qorǵanys mınıstri Dáýren Qosanov (14.10.1969).

Saryshaıan

2026 jyl Saryshaıandar úshin ósý men jańa deńgeıge kóterilýdiń jyly bolady. Tasyǵan energııa aǵymy alǵa jeteleıdi, biraq aqyl men ıkem de kerek.

Jyldyń alǵashqy jartysynda eski qorqynyshtan, shekteýli senimnen, psıhologııalyq kedergiden arylýǵa eń qolaıly ýaqyt.

Jazdan keıin kásibı ósý, halyqaralyq jobalarda tabys bastalady.

— Halyqaralyq deńgeıge shyǵaratyn daǵdyny qolǵa alyńyz. Ideıańyz ben áreketińiz qoldaý tabady. Ýaqytty durys quryp, naqty maqsat qoısańyz, jetistikke jetý jeńil bolady. Biraq jaqyn qatynas pen seriktestikke baılanysty qıyndyqtar týyndaýy múmkin. Neke men iskerlik baılanys ıkemdilikti talap etedi, — deıdi astrolog.

Іshki ister mınıstri Erjan Sádenov (24.10.1968) pen tótenshe jaǵdaılar mınıstri Shyńǵys Arynovtyń (29.10.1983) juldyznamasy — Saryshaıan.

Mergen

2026 jyl Mergender úshin ósý men jańa belesterge jetýdiń jyly bolady. Pozıtıvti energııa olardy alǵa jeteleıdi.

Jyldyń alǵashqy jartysynda ózgerister bolýy múmkin. Rýhanı joldy nemese shabyt beretin maqsatty anyqtaýǵa qolaıly kezeń.

- Sizdi halyqaralyq deńgeıge shyǵaratyn mindetterge batyl kirisińiz. Ideıalaryńyz ben áreketterińiz qoldaý tabady. Ýaqytty júıeleı bilý jáne aıqyn maqsat qoıa bilý - sizdiń basty maqsatyńyz bolmaq. Jaýapkershilikpen qarasańyz, eleýli jetistikterge jol ashylady. Biraq Mergenderde jaqyn qarym-qatynas pen yntymaqtastyq salasynda shıelenis bolýy múmkin. Neke men iskerlik baılanystar erekshe ıkemdilikti talap etedi. Ymyraǵa kelý qabiletińiz synalady, sizdi qaqtyǵystarǵa ıtermeleýi múmkin. Sondyqtan bıyldyń negizgi daǵdysy - jeke keńistikti saqtaı otyryp, kelisimge kele bilý, - dedi astrolog.

Mergender qatarynda Premer-mınıstr Oljas Bektenov (13.12.1980) jáne Saýda jáne ıntegratsııa mınıstri Arman Shaqqalıev (01.12.1977) bar.

Taýeshki

2026 jyl taýeshkiler úshin sabyr men strategııa jyly bolady. Bul kezde jyldam áreketten góri, ár qadamdy oılap jasaý kerek. Qýatyńyzdy asyra baǵalaýǵa bolmaıdy. Jyl basynan bastap jańa jobalarǵa den qoıý erte.

Tek senimdi tapsyrmalarǵa kirisińiz. Qıyn oryndalatyn ýádeler bermeńiz, ásirese iskerlik kelisimderde. Áıtpese bedelińizge nuqsan kelýi múmkin.

Jyldyń ekinshi jartysynda jaǵdaı jeńildeıdi, qysym azaıady, biraq tolyq demalýǵa áli ýaqyt bar. Ár qımylyńyzdy eseptep, únemdi jumys isteńiz. Sol kezde jyl basynda qabyldaǵan sheshimderdiń jemisin kóresiz.

— Іri ınvestıtsııalar men qaryzdardan, qarjylyq avantıýradan aýlaq bolyńyz. Qazir táýekel óte joǵary, esepter qate bolýy múmkin. Úlken maqsattarǵa emes, kúndelikti máselelerdi sheshýge kóńil bólińiz. Senimdi adamdar — jaqyn jandar men ýaqytpen synalǵan áriptester, — dedi Irına Ábdiraıymova.

Eske salaıyq, týǵan kúni Taýeshkiler juldyznamasyna týra kelgen sheneýnikter: Premer-mınıstrdiń orynbasary Qanat Bozymbaev(08.01.1969), Eńbek mınıstri Svetlana Jaqypova (16.01.1968), Ádilet mınıstri Erlan Sársembaev (01.01.1975).

Sýquıǵysh

2026 jyl Sýquıǵyshtar úshin jańarý jyly bolady. Bul — eski ádetten, shekteýshi oılardan arylý ýaqyty.

Jyldyń ekinshi jartysynda jańa jospar túzetin ýaqyt keledi. Keıde ózińizdi kóp nársege qabiletti sezinýińiz múmkin, biraq asyqpańyz. Ýáde bererde abaı bolyńyz, josparlar keıde kútpegen kedergilerge ushyraýy múmkin, sondyqtan ıkemdi bolǵan durys

— Árbir detalǵa nazar aýdaryńyz. Batyldyǵyńyz bolashaqqa jol ashady. Jańa jyl — tájirıbe jasap, jańa sheshimder izdeýge tıimdi ýaqyt. Intýıtsııańyzǵa senińiz, ol sizdi qatelikterden saqtaıdy, — deıdi astrolog.

Suquıǵyshtar qatarynda QR Densaýlyq saqtaý mınıstri Aqmaral Álnazarova bar.

Balyqtar

2026 jyl bul juldyz belgileri úshin múmkindik ashylady. Jyldyń birinshi jartysynda belsendi bolyp, ózin kórsetedi. Dostardyń kómegi, tanystar men seriktesterdiń usynysy — tabysqa jetýdiń basty joly. Aýqymdy. nátıje birlese jasalǵan jobalardan, qoǵamdyq is-sharalardan keledi.

Jyldyń ekinshi jartysy tynysh ótedi. Belsendilik azaıyp, isterińiz turaqtanady.

— Bir synaqty bastan keshirýi múmkin. Jumys pen uzaq merzimdi josparlarda qıyndyqtar týyndaýy múmkin. Jumysta kútpegen ózgerister, jańa basshylyq nemese jańa tehnologııany tez úırený qajet bolýy múmkin. Ózgeristerge qarsy shyqpańyz, oǵan shyǵarmashylyqpen qarasańyz, qıyndyqtardy óz paıdańyzǵa aınaldyra alasyz, — dep toqtaldy juldyzshy.

Aıta keteıik, Balyqtar — Qazaqstan Úkimeti múshelerinde joq belgi.

***

Astrologııa — sımvoldar sıqyry. Ol taǵdyrdy boljamaıdy, tek ómir jolyndaǵy baǵyttardy kórsetip, ózińizdi tyńdaýǵa kómektesedi. Qulaq túrińiz!