Úkimet otyrysynda qandaı másele qaralmaq
ASTANA. KAZINFORM — Búgin saǵat 10:00–de Úkimettiń kezekti otyrysy ótedi. Kún tártibine ótken jylytý maýsymynyń qorytyndysy jáne aldaǵy jylý berý maýsymyna daıyndyq máselelesi shyǵarylyp otyr.
Mınıstrler kabıneti otyrysynyń kún tártibine shyǵarylǵan másele boıynsha negizgi málimetterdi Ónerkásip jáne qurylys mınıstri Ersaıyn Naǵaspaev usynady. Mınıstr ótken jylǵy jylytý maýsymynda kommýnaldyq-turmystyq sektordyń kómirdi tutyný josparyna toqtalyp, aldaǵy jylytý maýsymyna kómirdi úzdiksiz jetkizý jospary ázirlenip, jergilikti atqarýshy organdarǵa, QTJ jáne kómir kompanııalaryna joldanǵanyn atap ótedi. Sondaı-aq ol jyl saıyn jylý jáne sý jabdyqtary men sý burý júıeleriniń tozýyna baılanysty tehnologııalyq apat týyndaý qaýpi bar óńirlerdi ataıdy. Munan bólek, Ersaıyn Naǵaspaev aldaǵy jylý maýsymyna daıyndalý maqsatynda mınıstrliktiń is-sharalar jospary daıyndalǵanyn atap ótip, jergilikti atqarýshy organdarǵa júktelgen mindetterge toqtalady.
Al otyrys qorytyndysy boıynsha ótetin baspasóz konferentsııasyna:
- Ónerkásip jáne qurylys mınıstri Ersaıyn Naǵaspaev;
- Energetıka vıtse-mınıstri Suńǵat Esimhanov qatysady.
Olar BAQ ókilderi tarapynan týyndaǵan saýaldarǵa jan-jaqty jaýap beredi.
Úkimet otyrysynyń tikeleı taratylymy PrimeMinister.kz saıtynda, YouTube resmı arnasynda, Facebook áleýmettik jelisinde, sondaı-aq UKIMET Telegram-kanalynda júredi.
Baspasóz konferentsııasynyń tikeleı taratylymy YouTube resmı arnasynda jáne Facebook áleýmettik jelisinde kórsetiledi.
Aıta keteıik, 20 mamyrda ótken Úkimet otyrysynda oqý jylynyń aıaqtalýy jáne balalardyń jazǵy demalysyn uıymdastyrý máselelesi talqylanǵan edi.
Sol ýaqytta Oqý-aǵartý mınıstri Ǵanı Beısembaev 2024-2025 oqý jylynyń aıaqtalýy, mektep jáne tehnıkalyq bilim berý júıesindegi nátıjeler, sondaı-aq balalardyń jazǵy demalysy men jumyspen qamtylýyn uıymdastyrý jónindegi sharalar týraly baıandady.
Mınıstrdiń aıtýynsha, bıylǵy oqý jylyn 3,9 mln oqýshy aıaqtaıdy. Onyń ishinde bastaýysh synypty — 391 myń, negizgi mektepti — 364 myń bala bitiredi.
Ǵylym jáne joǵary bilim vıtse-mınıstri Talǵat Eshenqulov Qazaqstandaǵy joǵary bilim berý júıesiniń jaı-kúıi, ulttyq biryńǵaı testileýdiń (UBT) bastalýy, stýdentterdi qoldaý sharalary jáne bólinetin granttar týraly aıtty. Qazirgi ýaqytta respýblıkada 122 joǵary oqý orny, onyń ishinde 10 zertteý joǵary oqý orny jáne 23 fılıal jumys isteıdi. 2024-2025 oqý jylynda azamattyq joǵary oqý oryndarynda 680 myńnan astam stýdent oqıdy, onyń ishinde 624,5 myńy bakalavrıatta, 39,2 myńy magıstratýrada, 7,6 myńy doktorantýrada jáne 8,9 myńy rezıdentýrada bilim alyp jatyr.
Densaýlyq saqtaý mınıstri Aqmaral Álnazarova mektep medıtsınasynyń damýy, sanıtarlyq baqylaýdyń kúsheıýi jáne balalar lagerleriniń saýyqtyrý maýsymyna daıyndyǵy týraly aıtty. Elimizde 7 myńnan astam mektep jumys isteıdi. Ár mektep emhanaǵa bekitilgen jáne meıirgermen 95% qamtamasyz etilgen.
Al Týrızm jáne sport vıtse-mınıstri Erjan Erkinbaev Úkimet otyrysynda demalys kezeńinde balalardyń saýyqtyrý demalysyn, bos ýaqytyn jáne jumyspen qamtylýyn uıymdastyrý boıynsha júrgizilip jatqan jumystarǵa toqtaldy.
Іshki ister mınıstri Erjan Sádenov Úkimet otyrysynda balalardyń qaýipsizdigin qamtamasyz etý jáne kámeletke tolmaǵandar arasyndaǵy quqyq buzýshylyqtardyń aldyn alý týraly baıandady.
Tótenshe jaǵdaılar mınıstri Shyńǵys Árinov jyl saıyn órt qaýipsizdigine baılanysty bilim berý nysandary tekserilip, tájirıbelik jattyǵýlar ótkiziletinin atap ótti.
Otyrysty qorytyndylaǵan Premer-Mınıstr Oljas Bektenov memlekettik organdarǵa jazǵy kezeńde balalardyń tolyqqandy demalýy men saýyǵýy úshin qajetti jaǵdaılar jasaýdy tapsyrdy.
— Birde-bir bala nazardan tys qalmaýǵa tıis. Kópbalaly, az qamtylǵan jáne turmysy tómen otbasylardan shyqqan balalardy qoldaýǵa basymdyq berilsin, — dep atap ótti Oljas Bektenov.
Premer-Mınıstr ákimderge jáne birqatar mınıstrlikke mynadaı tapsyrma berdi:
- balalar lagerleriniń ashylýyn jáne olardyń sanıtarııalyq-epıdemıologııalyq, órtke, terrorızmge qarsy qaýipsizdik talaptaryna sáıkestigin jeke baqylaýǵa alý;
- Densaýlyq saqtaý mınıstrligi jazǵy demalys kezinde balalardyń tamaqtanýyn turaqty sanıtarııalyq-epıdemıologııalyq baqylaýdy qamtamasyz etý;
- Tótenshe jaǵdaılar mınıstrligi ákimdiktermen birlesip, sý aıdyndary men basseınderde qutqarý jabdyqtarynyń bolýyn tekserip, personaldy sýda jáne órt kezinde balalardy qutqarý daǵdylaryna oqytý uıymdastyrý;
- Іshki ister mınıstrligi qoǵamdyq tártipti saqtaýdy qamtamasyz etý úshin árbir balalar ortalyǵy men lagerine, kópshilik is-sharalar ótetin oryndarǵa ýchaskelik polıtsııa ınspektorlaryn bekitý;
- Balalardyń jol-kólik jaraqatynyń profılaktıkasy máselesin nazarda ustaý;
- Uıymdastyrylmaǵan jıyndarda sportshy-oqýshylar mingen kólikterdiń jıi jol apatyna túsý jaǵdaılaryna baılanysty olardyń tıisti kelisýler, ruqsattarsyz jáne patrýldik polıtsııa bastap júrmese, óz eldi mekenderinen tys jerlerge shyǵýyna jol bermeý;
- Іshki ister, Tótenshe jaǵdaılar, Oqý-aǵartý, Densaýlyq saqtaý mınıstrlikteri men óńir ákimdikteri jazǵy demalys kezinde tıisti qyzmetterdiń úzdiksiz jumysyn qamtamasyz etý;
Barlyq uıymdastyrý máselesi 1 maýsymǵa deıin sheshimin tabýy kerek.
Munan bólek, Premer-Mınıstr kelesi tapsyrmalarǵa jeke toqtaldy:
- óńirlerdiń ákimdikteri men Oqý-aǵartý mınıstrligi — Memleket basshysynyń saýyqtyrý lagerleri men balalardyń ınnovatsııalyq shyǵarmashylyq ortalyqtaryn salý jónindegi tapsyrmasyn iske asyrýdy jedeldetsin. Barlyq nysan belgilengen merzimde paıdalanýǵa berilýge tıis;
- Týrızm mınıstrligi — balalar týrızminiń geografııasyn keńeıtý úshin ákimdiktermen óńiraralyq ózara is-qımyldy jolǵa qoıýy qajet.
— Batys óńirindegi balalarǵa elimizdiń shyǵys aımaqtaryn kórip-bilý qyzyqty bolmaq. Al ońtústik oblystardaǵy oqýshylardyń soltústik aımaqtarǵa jáne kerisinshe saıahattap barýyn uıymdastyrý qajet. Balalar elimizdiń kórikti jerleri men baı mádenı murasyn tanyp-bilýge tıis, — dep atap ótti Oljas Bektenov.