Úkimet óńirlerdiń sý tasqynyna daıyndyq barysyn tekserýdi bastady
ASTANA. KAZINFORM - Premer-mınıstrdiń orynbasary Qanat Bozymbaev jumys sapary barysynda Qaraǵandy oblysy óńiriniń sý tasqyny kezeńine daıyndyǵyn tekserdi, dep habarlaıdy Úkimettiń baspasóz qyzmeti.
Baspasóz málimetterine qaraǵanda, sondaı-aq sý basý qaýpi bar Buqar jyraý, Qarqaraly, Shet jáne Abaı aýdandaryndaǵy negizgi gıdrotehnıkalyq qurylystar men eldi mekenderdiń jaǵdaıyn baǵalady.
Nura ózeniniń arnasy boıynda Vıtse-premer Kókpekti, Baıqadam, Petrovka, Sarytóbe, Botaqara, Sheshenqara aýyldaryn, sondaı-aq «Baıqadam» jáne «Mınkovskaıa» sý bógetterin jáne Aşysý sý qoımasyn qarap shyqty. Sherýbaı-Nura ózeni boıynda Qarashoqy, Besoba, Aqsý-Aıýly, Qaıraqty, Nurataldy, Aqsý jáne Shopa eldi mekenderi tekserildi. Sonymen qatar Krasnaıa Polıana aýylyndaǵy qorǵanys bógettiriniń jaı-kúıi qaraldy.
Abaı aýdanynda ıÝjnyı, Qulaaıǵyr jáne Taszaemka aýyldary, sondaı-aq «Sherýbaı-Nura» jáne «Jartas» sý qoımalarynyń jaǵdaıy zerdelendi. Budan bólek, Qanat Bozymbaev Samarqand sý qoımasy gıdrotorabynyń jumysymen tanysyp, Chkalov aýylyndaǵy qorǵanys bógetterin tekserdi.
Qaraǵandy oblysy ákimdiginiń málimetinshe, óńirde negizgi sý tasqynyna qarsy is-sharalar aıaqtalǵan, jumystar Temirtaý qalasynda júrip jatyr. 25 shaqyrym qorǵanys dambalary men bógetter salyndy jáne nyǵaıtyldy, ózen arnalarynyń 28 shaqyrymnan astam sý tasqyny qaýpi bar ýchaskelerine sanatsııa júrgizildi, 21 shaqyrym drenaj jáne sý burý júıeleri tazartyldy. 54 avtojol ýchaskesinde sý ótkizý qabileti arttyryldy, tórt gıdrotehnıkalyq nysanǵa jóndeý júrgizildi.
Jergilikti atqarýshy organdar materıaldyq-tehnıkalyq jáne qarjylyq rezervterdi qalyptastyrdy, shamamen 1 mln 200 myń tekshe metr qar shyǵaryldy. Oblystyń 7 aýdanynda jáne 4 qalasynda sý basý qaýpi bar 139 eldi meken, sondaı-aq avtomobıl jáne temirjoldardyń 130 qaýipti ýchaskesi erekshe baqylaýǵa alynǵan. 217 sý sharýashylyǵy nysany turaqty monıtorıngte tur.
Qazirgi ýaqytta óńirdegi sý tasqyny jaǵdaıy turaqty. Negizgi sý qoımalary shtattyq rejımde jumys istep tur. Samarqand jáne Yntymaq sý qoımalarynan sanıtarlyq sý jiberý júrgizilip jatyr. Búgin kóktemgi sý tasqyny jaǵdaıynyń qolaısyz damýy kezinde qutqarý jáne ózge de jumystardy uıymdastyrýǵa daıyndyq maqsatynda «Kóktem-2026» respýblıkalyq komandalyq-shtabtyq oqý-jattyǵýy bastaldy. TJM aýmaqtyq deńgeıdegi habarlandyrý júıesiniń daıyndyǵyn tekserdi.
1 naýryzdan bastap tótenshe jaǵdaılardyń aldyn alý maqsatynda azamattyq qorǵaýdyń aýmaqtyq kishi júıesiniń barlyq kúshteri men quraldary joǵary daıyndyq rejımine kóshiriledi. Jaýap berý sharalaryna 3 579 adam jáne 1 047 tehnıka birligi jumyldyrylǵan.
Osyǵan deıin «Kóktem-2026» respýblıkalyq komandalyq-shtabtyq oqý-jattyǵýy bastalǵanyn habarladyq.