Úkimet Konstıtýtsııany ilgeriletý jónindegi is-sharalar josparyn bekitti
ASTANA. KAZINFORM – Qazaqstan Respýblıkasynyń Úkimeti 2026 jylǵy 15 naýryzda respýblıkalyq referendýmda qabyldanǵan Qazaqstan Respýblıkasynyń Konstıtýtsııasyn túsindirý jónindegi is-sharalar josparyn bekitti. Bul týraly Úkimettiń baspasóz qyzmeti habarlady.
Tıisti qaýlyǵa Premer-mınıstr Oljas Bektenov qol qoıdy.
Qujat Konstıtýtsııanyń negizgi erejelerin túsindirý boıynsha júıeli jumysty uıymdastyrýǵa, azamattardyń quqyqtyq saýattylyǵyn arttyrý, Negizgi Zań erejelerinen týyndaıtyn zańnamalyq sharalardy júzege asyrýǵa baǵyttalǵan.
Jospar úsh baǵyt boıynsha 36 is-sharany qamtıdy: uıymdastyrý sharalary, aqparattyq-túsindirý jumystary jáne Konstıtýtsııanyń oryndalýyn quqyqtyq qamtamasyz etý.
Atap aıtqanda, uıymdastyrýshylyq is-sharalar aıasynda Konstıtýtsııa mátinin basyp shyǵarý jáne taratý, onyń ishinde múgedektigi bar adamdar úshin beıimdelgen formatta ázirleý. Konstıtýtsııa elektrondy platformalarda ornalastyrylady.
Sondaı-aq ǵylymı-saraptamalyq qamtamasyz etý, aqparattyq-kórneki bezendirý, taqyryptyq materıaldar shyǵarý, kórme jáne aǵartýshylyq jobalaryn júzege asyrý boıynsha is-sharalar josparlanǵan.
Halyqtyń quqyqtyq mádenıeti men quqyqtyq saýattylyǵyn qalyptastyrý isine kóńil bólinýde. Josparǵa oqytý semınarlary men bilim berý is-sharalaryn ótkizý, mektep jáne JOO baǵdarlamalarynyń mazmunyn jańartý, «Quqyq negizderi» jáne «Zań men tártip» kýrstaryn, ádistemelik materıaldar men balalar basylymdaryn ázirleý kiredi.
Aqparattyq-túsindirý jumystary aıasynda birqatar is-sharalar men keshendi medıa-jospar ázirlendi.
Konstıtýtsııanyń júzege asyrylýyn quqyqtyq qamtamasyz etý jónindegi is-sharalar, onyń ishinde zańnamalyq sharalardy iske asyrý, qoldanystaǵy zańnamany taldaý, Negizgi Zańnyń normalaryn eskere otyryp, strategııalar men tujyrymdamalardy ózektendirý sharalary bólek qarastyrylǵan.
Jalpy Jospar Konstıtýtsııa normalaryn halyq arasynda keńinen túsindirýdi jáne elimizdiń Negizgi Zań erejeleriniń tolyqqandy júzege asyrylýyn qamtamasyz etedi.
Aıta ketelik 1 shildeden bastap jańa Konstıtýtsııa kúshine enetini týraly jazǵan edik.