Úkimet elimizdiń astyq salasyn qoldaýǵa 40 mlrd teńge bóldi
ASTANA. KAZINFORM – Memleket basshysynyń tapsyrmalaryn júzege asyrý sheńberinde Úkimet aýyl sharýashylyǵy taýaryn óndirýshilerdi qoldaý úshin rezervten 40 mlrd teńge bóldi. Tıisti qaýlyǵa Premer-mınıstr Oljas Bektenov qol qoıdy. Bul týraly Úkimettiń baspasóz qyzmeti habarlady.
Qarajatty kóktemgi egis jumystarynyń sapaly júrgizilýin qamtamasyz etý, 2025 jyldyń ónimin qabyldaý úshin astyq qoımalaryn bosatý, qazaqstandyq astyq eksportynyń básekege qabilettiligin arttyrý, sondaı-aq jańa ótkizý naryqtaryn ıgerý sııaqty keshendi mindetterdi sheshýge baǵyttaý josparlanyp otyr.
2024 jyly elimizde dándi daqyldar boıynsha 25,2 mln tonna kóleminde rekordtyq ónimi jınaldy. Joǵary ónimdilikke agrotehnologııany durys qoldaný nátıjesinde jáne qolaıly aýa raıynyń arqasynda qol jetkizildi.
Sonymen qatar ishki naryq suranysy shamamen 10 mln tonna.
Memleket basshysy Qasym-Jomart Toqaev 2024 jyly aýyl sharýashylyǵy eńbekkerleriniń birinshi forýmynda atap ótkendeı, Qazaqstannyń dándi daqyldar boıynsha eksporttyq áleýeti 12 mln tonnany quraıdy. Bul — aýqymdy kólem jáne úlken jaýapkershilik. Úkimettiń basty mindeti — sharýalarǵa óz ónimderin sheteldik naryqtarda ótkizýde jan-jaqty qoldaý kórsetý.
— Búginde bul eksporttyq áleýettiń 10 mln tonnasy baǵyttary ázirlengen dástúrli ótkizý naryqtaryna, al 2 mln tonnasy alys baǵyttar men jańa naryqtarda satý úshin jóneltildi, — delingen habarlamada.
Osylaısha, tasymaldaý shyǵyndaryn azaıtýdy sýbsıdııalaý sharýalarǵa astyqty jańa naryqtarǵa der kezinde eksporttaýǵa jáne astyq qoımalaryn jańa ónimge daıyndaýǵa múmkindik beredi.
Esterińizge sala keteıik, sońǵy derekter boıynsha 2024 jyldyń qyrkúıeginen sáýir aıyna deıin astyq eksporty 6,9 mln tonna boldy, ol 2023-2024 jyldardyń uqsas kezeńinen 54%-ǵa artyq. 2025 jylǵy qańtarda astyq eksporty 780,4 myń tonna boldy, bul 2024 jylǵy sáıkes kezeńnen 34,5%-ǵa artyq (579,9 myń tonna).
Búginde eksporttyń dástúrli baǵyttary — Ózbekstan, Tájikstan, Qyrǵyzstan, Aýǵanstan. Iran men Ázerbaıjanǵa jetkizý kólemi ulǵaıdy. Tranzıttik joldar Reseı, Latvııa, Lıtva, Estonııa, Ázerbaıjan, Grýzııa, Túrkimenstan jáne Qytaı aýmaqtary arqyly ótedi.
Aıta ketelik aýylsharýashylyq taýar óndirýshiler QQS-tan tolyq bosatylmaıtyny týraly jazǵan edik.