Úkimet búgin egis jumystaryn júrgizýdiń barysyn pysyqtaıdy
ASTANA. KAZINFORM – Búgin saǵat 10:00–de Úkimettiń kezekti otyrysy ótedi. Onda mınıstrler kabınetiniń músheleri 1 máseleni talqyǵa salýdy kózdep otyr.
Úkimet otyrysynyń kún tártibine myna másele shyǵarylady:
— Kóktemgi egis jumystaryn júrgizý jáne vegetatsııalyq kezeńdi ótkizý.
Kóterilgen másele boıynsha Aýyl sharýashylyǵy mınıstri Aıdarbek Saparov pen Sý resýrstary jáne ırrıgatsııa mınıstri Nurjan Nurjigitov negizgi baıandama jasaıdy, munan bólek Úkimet basshysy keıbir óńir ákiminiń esebin tyńdaýy múmkin.
Energetıka mınıstri Erlan Aqkenjenov Úkimet otyrysynda kóktemgi egis jumystaryn júrgizý úshin aýyl sharýashylyǵy taýar óndirýshilerin dızel otynymen qamtamasyz etý barysy týraly esep beredi. Ol jeńildetilgen otyn jetkizý kestesiniń oryndalýyna jáne jóneltilimderdiń ashyqtyǵyn qamtamasyz etý sharalaryna toqtalady. Sondaı-aq qazirgi jetkizilim jaǵdaıy men vedomstvo tarapynan protsesti basymdyqpen baqylaý jóninde baıandamaq.
Este bolsa, osy jyldyń 11 aqpanynda ótken Úkimet otyrysynda kóktemgi dala jumystaryna daıyndyq máseleleri qaralǵan edi. Aýyl sharýashylyǵy mınıstriniń sol kezdegi deregine sáıkes, 2025 jyly 23,8 mln gektar alqapqa aýyl sharýashylyǵy daqyldaryn egý josparlanǵan. Bul — 2024 jylmen salystyrǵanda 518 myń gektarǵa artyq. Dándi jáne burshaqty daqyldardyń egistik alqaptary — shamamen 16,6 mln gektar (2024 jyly — 16,7 mln ga). Maıly daqyldardyń aýdany 365 myń gektarǵa artyp, 3,3 mln gektarǵa jetedi, onyń ishinde kúnbaǵys daqyldary 50,6 myń gektarǵa ósip, 1,3 mln gektarǵa deıin ulǵaıady. Sondaı-aq kartop alqabyn 14,9 myń gektarǵa ulǵaıtyp, aýmaqty 136,8 myń gektarǵa deıin jetkizý josparlanǵan. Al qaraqumyq daqyldary 41,5 myń gektarǵa artyp, 147 myń gektar jerge egiledi. 2025 jyly qant qyzylshasynyń aýdany 18,4 myń gektar bolady. Jemshóp daqyldarynyń aýdany 184 myń gektarǵa ulǵaıyp, 3,4 mln gektarǵa jetedi. Maqta daqyldary — 135,2 myń gektar, al kúrish 90,2 myń gektardy alady.
Premer-Mınıstr otyrys qorytyndysynda mınıstrlikter men ákimdikterge mynadaı tapsyrmalar berdi:
- Aýyl sharýashylyǵy mınıstrligine «Báıterek» holdıngimen birlesip, eginshilerdi tıimdi memlekettik qoldaý maqsatynda nesıe men sýbsıdııa berý rásimderin ońtaılandyrý jáne jeńildetý sharalaryn qabyldaý.
- Energetıka, Aýyl sharýashylyǵy mınıstrlikteri men óńir ákimderi arzandatylǵan otynnyń tıisti kólemin jetkizýdi baqylaýda ustaý. Sharýalarǵa tıesili otynnyń satylyp ketýine jol beretin kompanııalar men jeke tulǵalarǵa qatysty qatań sharalar qabyldaý.
- Sý resýrstary mınıstrligi Aýyl sharýashylyǵy mınıstrligimen jáne ákimdiktermen birge fermerlerdi sýarmaly sýmen úzdiksiz qamtamasyz etý sharalaryn qabyldaý.
Búgingi otyrys barysynda Sý mınıstri Nurjan Nurjigitov 2025 jylǵy vegetatsııalyq kezeńge daıyndyq barysy jaıly baıandama jasaıdy. Mınıstr agrarlyq sektor úshin asa mańyzdy sanalatyn vegetatsııalyq maýsymdaǵy sý tapshylyǵynyń aldyn alý, sýarý júıeleriniń daıyndyǵy jáne sý resýrstaryn tıimdi basqarý sharalary boıynsha qabyldanyp jatqan is-sharalardy tanystyrady.
Sonymen qatar Úkimet otyrysynda óńirlerdiń daıyndyq deńgeıi, transshekaralyq sý máseleleri jáne sharýalarmen ózara is-qımyl jaıy da sóz bolady.
Otyrys bitkennen keıin baspasóz máslıhaty ótkiziledi. Onda Aýyl sharýashylyǵy mınıstri Aıdarbek Saparov pen Sý resýrstary jáne ırrıgatsııa vıtse-mınıstri Nurlan Aldamjarov BAQ ókilderiniń saýaldaryna jaýap beredi.
Aıta keterligi, keshe Májiliste sý sharýashylyǵy salasyn reformalaý boıynsha qabyldanyp jatqan sharalarǵa arnalǵan Úkimet saǵaty ótti. Іs-shara aıasynda taqyryptyq kórme uıymdastyrylyp, onda sý jáne balyq sharýashylyǵy, sýdy únemdeý, klımatqa tózimdi sý resýrstaryn damytý, ırrıgatsııalyq arnalardaǵy sýdy esepke alý jáne basqa da baǵyttardaǵy ınnovatsııalyq jobalar usynyldy.
Negizgi másele boıynsha Sý resýrstary jáne ırrıgatsııa mınıstri Nurjan Nurjigitov negizgi baıandama jasap, depýtattar tarapynan týyndaǵan saýaldarǵa jaýap berdi. Ol Reseı tarapy keı jyly Qazaqstanǵa tıesili sýdyń teń jartysyn berip kelgenin jasyrǵan joq.
— Sý kólemine kelsek, 2019 jyly Jaıyq ózeninen eń tómen kólemde sý berilgen. Jalpy kelisim boıynsha jyl saıyn eń kem degende 7,8 mlrd tekshe metr sý alýymyz kerek. Al 2019 jyly 3,5 mlrd tekshe metr ǵana sý aldyq. Sondyqtan memleket basshylary tapsyrma berip, arnaıy jol kartasy ázirlengen. Jol kartasynyń aıasynda Jaıyqtyń boıyndaǵy sý qoımalary men bógetterin túgendeý kerek. Ol jol kartasynyń da merzimi uzartyldy, — dedi mınıstr.
Sonymen qatar Nurjan Nurjigitov Májilis depýtaty Erlan Saırovtyń saýalyna jaýap bere kele, sýdyń zańsyz saýdasy tolyq joıylmaı turǵanyn moıyndady.
— Qara naryqqa baılanysty aıtqanyńyz ras. Búgingi tańda búkil respýblıka kóleminde «Qazsýsharmen» kelisimshart jasamaı, sýdy alý degen máseleler bar. Biz ony qalaı sheship jatyrmyz? «Qazsýshar» mekemesimen qazir kelisimsharttardy jasaýdy elektrondy formatqa kóshirýge kiristik. Sebebi elektrondy túrge kóshirsek, qadaǵalaý máselesi retteledi. Odan bólek ózimizdiń aqparattyq taldaý ortalyǵy arqyly sharýa qojalyǵy sýdy kelisimshartqa saı aldy nemese kóp aldy, kassaǵa qansha aqsha tústi nemese túsken joq degen máselege ǵaryshtan monıtorıng jasaýdy engizeıin dep jatyrmyz. Ol jalpy 100 paıyz problemany sheshpeıtin shyǵar. Biraq bizge úlken qural retinde járdem kórsetedi, — dedi vedomstvo basshysy.
Al ótken aptadaǵy Úkimet otyrysynda hımııa jáne munaı hımııasy salasyn damytý máselesi talqyǵa túsken bolatyn. Onda Energetıka mınıstri Erlan Aqkenjenov múddeli taraptarmen, onyń ishinde «QazMunaıGaz» ulttyq kompanııasy, «KazEnergy» qaýymdastyǵy, munaı-gaz-hımııa ónimderin óndirýshiler men tutynýshylar qaýymdastyǵymen, sondaı-aq memlekettik organdarmen birlesip «Munaı-gaz-hımııa ónerkásibi týraly» zań jobasyn ázirleý qolǵa alynǵanyn aıtqan edi.
Kólik mınıstri Marat Qarabaev tapsyrystar ýaqtyly berilip, ýaqtyly oryndalyp jatqanymen bári bir bıtým ımporty toqtamaıtynyn atap ótti.
Otyrysty qorytyndylaǵan Úkimet basshysy Oljas Bektenov hımııa salasy ónimderin syrtqa shıkizat emes, daıyn ónim retinde shyǵarý kerektigin aıtty.
— Búginde hımııa óndirisi salasy shıkizatynyń shamamen 45% tereń óńdelmeı, birden eksportqa shyǵarylady. Elimiz jyl saıyn 800 myń tonnaǵa jýyq fosforıt shıkizatyn eksporttaıdy. Ónerkásip mınıstrligi shıkizatty qaıta óńdeý boıynsha joǵary tehnologııalyq jańa jobalarǵa jeke ınvestıtsııa tartý úshin jaǵdaı jasaýy qajet, — dedi Úkimet basshysy.
Sonymen qatar Premer-Mınıstr Ekologııa jáne tabıǵı resýrstar mınıstrligine, Ónerkásip jáne qurylys mınıstrligi jáne Energetıka mınıstrligimen birlesip, bıyl zamanaýı ekologııalyq súzgiler men ýtılızatsııalaý tehnologııalaryn áli de paıdalanbaı otyrǵan kásiporyndardy túgendeýdi aıaqtap, olardy jańǵyrtý men jasyl tehnologııalardy engizýdiń arnaıy josparyn qabyldaýdy tapsyrdy.
Aıta keteıik, Úkimet otyrysynyń tikeleı taratylymyn PrimeMinister.kz saıtynan, YouTube resmı arnasynan, Facebook áleýmettik jelisinen, sondaı-aq UKIMET Telegram-kanalynan kórýge bolady.
Baspasóz konferentsııasy YouTube resmı arnasy men Facebook áleýmettik jelisinen tikeleı kórsetiledi.