UQK «Naıza-Antıterror-2024» terrorızmge qarsy oqý-jattyǵýyn aıaqtady
ASTANA. KAZINFORM — 2024 jylǵy 28 maýsymda Qyzylorda, Qaraǵandy jáne Abaı oblystarynda 31 mamyrdan bastap ótkizilgen «Naıza-Antıterror-2024» keshendi respýblıkalyq terrorızmge qarsy oqý-jattyǵýy aıaqtaldy. Bul týraly UQK baspasóz qyzmeti málimdedi.
Oǵan Ulttyq qaýipsizdik komıteti, ishki ister, qorǵanys, tótenshe jaǵdaılar mınıstrlikteri jáne jergilikti atqarýshy organdar qatysty.
«Oqý-jattyǵý sheńberinde terrorıstik qaterlerge qarsy is-qımyl jasaý bilikteri men daǵdylary bekitildi, tótenshe sıpattaǵy daǵdarysty ahýaldarǵa den qoıý tetikteri men tótenshe jaǵdaı kezeńindegi is-qımyl pysyqtalyp, múddeli memlekettik organdardy habardar etý jáne aqparattyq ózara is-qımyl júıelerin tekserý júzege asyryldy», — delingen habarlamada.
Jaýyngerlik is-qımyldarǵa jaqyn jaǵdaılarda dıversııalyq-terrorıstik aktilerdiń aldyn alý, sondaı-aq olardyń saldarlaryn azaıtý jáne joıý jónindegi kúshtik qurylymdardyń trenıngteri ótkizildi.
Sonymen qatar arnaýly maqsattaǵy bólimsheler jarylǵysh qurylǵylardy tabý jáne zalalsyzdandyrý, shartty terrorısterdi anyqtaý jáne beıtaraptandyrý, kepilge alynǵandardy bosatý jáne zardap shekkenderge kómek kórsetý daǵdylaryn pysyqtady.
Іs-shara qorytyndylary boıynsha elimizdiń terrorızmge qarsy áleýetin nyǵaıtý sheńberinde kúsh-jigerdi ıntegratsııalaý boıynsha qosymsha sharalar ázirlendi.
