Úkimet júzege asyrǵan qadamdar oryndalmasa, jaǵdaı aıtarlyqtaı qıyn bolar edi - Godýnova
Búgin Senattyń jalpy otyrysynda Úkimettiń jáne Joǵary aýdıtorlyq palatanyń 2022 jylǵy respýblıkalyq bıýdjettiń atqarylýy týraly esepteri qaraldy.
Osy oraıda jalpy otyrystan keıin tilshiler palata basshysynan bıýdjettiń atqarylýynda memlekettik organdardyń kemshilikteri boıynsha qandaı jaýapkershilik bolatynyn surady.
Óz kezeginde Natalıa Godýnova bıýdjettiń oryndalýyna qatysty Úkimetke jıi syn aıtylatynyn, alaıda bul salada obektıvti sebepter bar ekenin aıtty.
«Joǵary aýdıtorlyq palata óziniń quzyreti aıasynda syn aıtyp jatady. Aýdıt júıeli problemany, kemshilikterdi, zań talaptaryn buzý derekterin anyqtaıdy. Bul bizdiń negizgi mindetimiz. Biraq Úkimettiń aldynda turǵan qıyndyqtardy da nazarǵa alǵan jón. Álemdegi geosaıası jaǵdaıdy, álemdik naryqtardaǵy týrbýlenttilik, Qazaqstannyń negizgi eksporttyq taýarlary baǵasynyń qubylmalylyǵy sııaqty qazirgi jaǵdaıda ózińizdi úkimettiń ornyna qoıyp kórińiz. Osyndaı jaǵdaıda belgilengen mindetterdi oryndaý asa kúrdeli bolyp tur. Eger Úkimet júzege asyrǵan qadamdar oryndalmasa, onda elimizdegi jaǵdaı aıtarlyqtaı qıyn bolar edi», - dedi ol.
Onyń sózine qaraǵanda, bıýdjettiń atqarylýy salasynda júıeli problemalardy anyqtap, kemshilikterge jol bermeýge erekshe ekpin qoıylyp otyr. Joǵary aýdıtorlyq palatanyń mindeti – osy júıeli problemalardy anyqtaý.
Búgin Senattyń jalpy otyrysynda Joǵary aýdıtorlyq palatanyń tóraǵasy Natalıa Godýnova tıimsiz salyq jeńildikterin alyp tastaýdy usyndy.
