Úkimet basshysy dıqandarǵa alǵys aıtty

ASTANA. QazAqparat – Bıyl elimiz 18 mln tonnadan astam astyq jınaýdy josparlap otyr. Bul týraly QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Egin oraǵy aıaqtalyp qaldy. Negizinen bıyl aýa raıy qolaıly boldy. Túsim ortasha jyldyq kórsetkishten joǵary bolady dep kútilip otyr. Jalpy 18 mln tonnadan astam astyq jınaý josparlanǵan. Endigi mindet – ónimniń sapasyn tómendetpeı, durys saqtaý. Sonymen qatar, ishki suranysqa jáne eksportqa qajetti astyq kólemin naqty bólip qoıý kerek», - dedi Álıhan Smaıylov Úkimet otyrysynda.

Úkimet basshysy bıyl da Qazaqstan ózin astyqpen tolyqtaı qamtamasyz etetinin aıtty.

«Astyqtyń túsimi jyldaǵydan 30 paıyzǵa joǵary. Ótken jyly orta eseppen gektaryna 9,8 tsentner ónim jınalsa, bıyl 13 tsentnerdi qurap otyr. Bul da bolsa – dıqandarymyzdyń tynymsyz eńbeginiń jemisi. Osy iske atsalysqan aýyl eńbekkerlerin mol ónim jınaýymen quttyqtap, qajyrly eńbekteri úshin alǵys aıtamyz», - dedi ol.

Foto: primeminister.kz