Úkimet basshysy dári-dármekpen qamtamasyz etýdi qatań baqylaýǵa alýdy tapsyrdy
«Baıandamadan kórip otyrǵanymyzdaı, negizgi kózdelgen kórsetkishterge qol jetkizildi. Kórsetkishterdiń jaqsarǵanyn kórip otyrmyz. Elbasy buǵan qosa bıylǵy Joldaýynda halyqtyń jaǵdaıyn jaqsartý boıynsha taǵy birqatar qosymsha naqty tapsyrma berdi. Densaýlyq salasyn jańǵyrtý máselesin aldymyzǵa qoıdy. Bul negizde áleýmettik medıtsınalyq saqtandyrý júıesin engizý boıynsha jumysty Eljan Amantaıuly (Densaýlyq mınıstri Birtanov) baqylaýǵa alyp, túsindirý jumystaryn júrgizý qajet. Dári-dármekpen qamtamasyz etý jumystary qatań baqylaýda bolýy kerek», - dedi Úkimet basshysy.
Sonymen qatar ol Úkimettiń keńeıtilgen májilisinde Memleket basshysy elektrondy densaýlyq saqtaý júıesin engizý arqyly medıtsınalyq kómektiń tıimdiligi men qoljetimdiligin arttyrý tapsyrmasyn bergenin eske saldy.
«Ótken aptada bul boıynsha jumys jınalysyn ótkizgen bolatynbyz. Sáýir aıynda Úkimet otyrysyna Asqar Qýanyshulymen (Úkimet basshysynyń orynbasary Jumaǵalıev) birge daıyndalýyńyzdy suraımyn», - dedi Baqytjan Saǵyntaev Densaýlyq saqtaý mınıstri Birtanovqa qarata.
Sonymen qatar otyrysta Úkimet basshysynyń orynbasary Erbolat Dosaev sáýir aıynda «Densaýlyq» memlekettik baǵdarlamasyna ózgerister engizý kózdelip otyrǵanyn, al óńirlerdiń baǵdarlama aıasynda satyp alǵan medıtsınalyq qural-jabdyqtarynyń tıimdiligi jaıly esep mamyr aıynda Úkimetke beriletindigin atap ótti.
