Ýımbldon: qazaqstandyq jasóspirimder juptyq synda kelesi aınalymǵa shyqty

ASTANA. KAZINFORM – Qazaqstandyqtar Ámir Omarhanov, Asyljan Arystanbekova men Sonıa Jıenbaeva juptyq synda jasóspirimder arasynda Ýımbldon týrnıriniń 1/8 fınalyna shyqty.

Ámir Omarhanov reseılik Tımofeı Derepaskomen birge bastapqy kezdesýin brazılııalyq Entso Kolmann De Freıtas – germanııalyq Tom Sıkenbergermen ótkizdi.

Birinshi partııada brazılııalyq-germanııalyq dýet taı-breıkte basymdylyq tanytty – 7:6 (7:5). Degenmen Omarhanov pen Derepasko kambek jasaı aldy – 6:4, 10:8. Tartysty match 1 saǵat 35 mınýtqa sozyldy.

Ámir Omarhanov – Tımofeı Derepasko shırek fınalǵa shyǵý úshin jarystyń 3-raketkalary, amerıkalyqtar Kaılan Bıgan – Djagger Lıchpen talasady.

Á.Omarhanov pen T.Derepasko bıyl sensatsııa jasap, Rolan Garrostyń jartylaı fınalyna deıin jetken edi.

Qyzdar arasynda Asyljan Arystanbekova – Sonıa Jıenbaeva juby Ýımbldonnyń alǵashqy aınalymynda amerıkalyq Krıstasha MakNıl – slovakııalyq Mıa Pohankovanyń mysyn basty – 7:6 (7:5), 7:6 (7:3). Bul kezdesý 1 saǵat 37 mınýtta bitti.

Qazaqstandyq juptyń 1/8 fınaldaǵy qarsylastary keıin anyqtalady.

Eske sala keteıik, budan buryn Ýımbldonda Ámir Omarhanovtyń jasóspirimder arasynda 1/8 fınalǵa joldama alǵanyn jazǵan edik.

Sondaı-aq Elena Rybakına jartylaı fınalǵa shyqty.

Sonıa Jıenbaeva jasóspirimder arasynda úshinshi aınalymǵa ótti.