Ýımbldon: Elena Rybakına shırek fınalǵa joldama aldy

LONDON. KAZINFORM - Qazaqstannyń birinshi, álemniń 4-raketkasy Elena Rybakına Ýımbldon týrnıriniń shırek fınalyna shyqty.

Otandasymyz tórtinshi aınalymda álemniń 18-raketkasy, reseılik Anna Kalınskaıamen sheberlik baıqasty.

Osyǵan deıin qarsylastar ózara tórt ret kezdesken, esep teń edi - 2:2. Bul joly Kalınskaıa matchty breıkpen bastady - 2:0. Biraq Rybakına tarazy basyn teńestirip qana qoımaı, setti aldy - 6:3.

Ekinshi partııada Elena 3:0 esebimen alǵa shyqqannan keıin Kalınskaıa básekeni jalǵastyrýdan bas tartty. Nebári 50 mınýtqa sozylǵan báseke barysynda qazaqstandyq sportshy 7 eıs jasap, 6 breık-poınttyń tórteýin paıdalandy. Reseılik tennısshi 1 eıs, 1 breıkpen (3 breık-poınt) shekteldi.

Elena Rybakına jartylaı fınalǵa shyǵý úshin álemniń 21-raketkasy, Ýkraına ókili Elına Svıtolına nemese reıtıngide 42-satydaǵy qytaılyq Sınıýı Vannyń qaı jeńgenimen talasady.

Eske sala keteıik, budan buryn Ýımbldonda Ámir Omarhanovtyń jasóspirimder arasynda alǵashqy jeńisine qol jetkizgenin jazǵan bolatynbyz.