Ýılıam hanzada qazaqstandyq ekologııalyq jobany marapatqa usyndy
LONDON. KAZINFORM - Qazaqstandyq «Altyn dala» tabıǵatty qorǵaý bastamasy álemdik ekologııalyq baıqaýda 15 fınalıstiń qatarynan tabyldy. Bul týraly Ýılıam hanzada habarlady. Ulybrıtanııanyń bolashaq taq murageri elimizde flora men faýnany qorǵaý jáne qalpyna keltirý baǵytynda jasalyp jatqan jobaǵa joǵary baǵa berdi, dep habarlaıdy Kazinform tilshisi.
«Altyn Dala» 2005 jyly aqbókenderdiń joıylyp ketýine jol bermeý úshin qurylǵan. Zor eńbektiń nátıjesinde túz taǵylarynyń popýlıatsııasy buryn-sońdy bolmaǵan 2,8 mıllıonǵa jetti. «Altyn Dala» seriktesterimen birlesip, aqbókenderden bólek dala búrkiti, qulan jáne Prjevalskıı jylqysynyń tuqymyn qaıta qalpyna keltirý úshin áreket etti.
EarthShot Prize syılyǵyn Ulybrıtanııa hanzadasy Ýılıam men áıgili telejúrgizýshi ári natýralıst Devıd Attenboro taǵaıyndaǵan. Maqsaty jahandyq ekologııalyq problemalardy sheshýge atsalysý.
«Baýqaýdyń 15 fınalısi buryn-sońdy bolmaǵan, ınnovatsııaǵa toly, tıimdi sheshimder usyndy. Usynys ıeleri –ǵalamshardy jaqsy jaǵyna qaraı ózgertýge nıettiler. Aralarynda tabıǵatty qorǵaý jáne qalpyna keltirýge atsalysqan «Altyn dala» bastamasy da bar», - deıdi Ýılıam hanzada.
«Altyn Dala» jobasy Qazaqstannyń bıoalýantúrligin saqtaý qaýymdastyǵymen, Qazaqstan Respýblıkasy Ekologııa jáne tabıǵı resýrstar mınıstrligimen jáne birqatar halyqaralyq uıymdarmen birlesip júzege asyrylyp keledi.
«Qazaqstandyq qoǵamdyq jáne memlekettik uıymdardyń eńbegi álemdik deńgeıde baǵalanyp jatqany qýantady. Bul qoldaý bolashaqta kókjıegimizdi keńeıtip, jańa bilim men tájirıbege jol ashyp, tabıǵattyń, klımattyń jáne adamdardyń ıgiligi úshin septigi tıedi dep dep úmittenemiz», - deıdi «Altyn dala» tabıǵatty qorǵaý bastamasynyń atqarýshy dırektory Vera Voronova.
15 fınalıstiń beseýi úzdikterdiń úzdigi dep tanylyp, árqaısysy 1 mıllıon fýnt sterlıng kóleminde syıaqy alady. Qazaqstandyq bastama Ulybrıtanııa, Ekvador jáne Perý jobalarymen básekege túspek. Marapattaý rásimi ótken jyly Sıngapýrde uıymdastyrylsa, bıyl 6 qarashada Ońtústik Afrıkada ótedi.
