Ýfada «Jazıra Jaıyq» sýretshiler kórmesi ótpek
M.Ótemisov atyndaǵy Batys Qazaqstan memlekettik ýnıversıtetiniń qaýymdastyrylǵan professory, QR mádenıet salasynyń úzdigi Qýandyq Nasıhatulynyń aıtýynsha, shara «Týǵan jer» baǵdarlamasy aıasynda týǵan el ónerin ejelden mıdaı aralasqan kórshi memlekettiń qalalarynda nasıhattaý maqsatynda qolǵa alynyp otyr. Alǵashqy kórme 10-25 mamyr aralyǵynda Ýfa kórkemóner galereıasynda ótkizilmekshi.
Budan buryn «Óner» qory men QR BQO Sýretshiler odaǵy osyndaı birneshe shara uıymdastyrǵan bolatyn. Atap aıtqanda, «Jazıra Jaıyq» ataýymen sýretshilerdiń oblystyq (Oral, 2009-2010 j.j.), halyqaralyq (Oral, 2011-2012 j.j.), respýblıkalyq (Almaty, 2012-2013, Oral, 2014 j.j.) kórkemsýret kórme-konkýrsyn, QR tuńǵysh Prezıdenti - Elbasy qorynyń qoldaýymen Almaty qalasynda Á.Qasteev atyndaǵy Qazaqstan Respýblıkasynyń memlekettik óner murajaıynda BQO sýretshileriniń tuńǵysh toptyq kórkemóner kórmesin ótkizdi. BQO Sýretshiler odaǵy sondaı-aq Batys Qazaqstanmen shektesetin Reseıdiń bes birdeı oblysynyń (Astrahan, Volgograd, Samara, Saratov, Orynbor) sýretshilerimen tyǵyz shyǵarmashylyq baılanysta.
«Saǵat sanap ózgerip jatqan álemdik úderiske rýhanı dúnıesi ornyqty, bilimdi, kásipqoı adam ǵana ilese alady. Rýhanı dúnıesi myqty jannyń almaıtyn asýy bolmaıdy. Bul sýretshilerge de qatysty. Sondyqtan olar óz qazanynda qaınaı bermeı, shet elderge de shyǵyp, óz ónerlerin kórsetýmen birge ozyq úlgilerdi kórip, túısine bilýleri kerek», - dedi «QazAqparat» tilshisine Q.Mádir.
