UEM temekini shekteýge qatysty óz ustanymyn bildirdi
Kásipkerlikti damytý departamentiniń dırektory Aslanbek Jaqypovtyń aıtýynsha, mınıstrlikke temekini shekteýge qatysty qujattar túsken joq. Onsyz atalǵan memorgan tıisti sharalardy qabyldaı almaıdy.
«Árıne, eń aldymen kásipkerlerdiń ondaı shekteýden qandaı shyǵyn kóretinin eseptep shyǵarý qajet. Sebebi, kez kelgen shekteý kezinde bıznesmender qatty shyǵyndalady. Sondyqtan kásipkerlerdiń shyǵyndaryn eseptep, ondaı bastamanyń naqty paıdasyn kórmeı, shekteý engizgen durys emes sııaqty. Negizi, ondaı másele kásipkerlik kodekste de kórsetilgen. Sóz joq, tekmekige qatysty shekteý jan-jaqty zerdelenedi. Sodan keıin ǵana ony zańǵa engizý, ıa bolmasa, alyp tastaý máselesi sheshiledi. Osy oraıda bıznes qaýymdastyǵyn atalǵan máseleni qyzý talqylaýǵa shaqyramyn. Óıtkeni saraptamanyń ózi birlesip jasalady», - dedi A.Jaqypov Astanada ótken baspasóz máslıxatynda.
Aıta keteıik, jaqynda «Atameken» UKP «Halyq densaýlyǵy jáne densaýlyq saqtaý júıesi týraly» jańa kodekstiń jobasyn qoǵamdyq talqylaýǵa shyǵarǵan bolatyn. Atap aıtqanda, kodekste bilim mekemelerinen 100 metr qashyqtyqta temeki ónimderin satýǵa tyıym salynǵan. Budan bólek, temeki ónimderin sórege qoıýǵa bolmaıdy. Al shaǵyn saýda oryndary (aýdany 10 sharshy metrge deıingi) temekini múldem sata almaıdy.
«Atameken» UKP taratqan aqparatqa sáıkes, 10 sharshy metrge jetpeıtin shaǵyn dúkenderge temeki ónimderin satýǵa tyıym salsa, myńdaǵan saýda oryndary bankrotqa ushyraıdy. Sebebi, olarǵa tıesili tabystyń 30-40 protsenti temekiden túsedi. Al «100 metrlik shekteý» respýblıka boıynsha saýda oryndarynyń 80 protsentin, naqty aıtqanda, 49 000 shaǵyn jáne orta bıznes ókilderin shyǵynǵa batyrady.
Budan bólek, kodeks jobasyna qoǵamdyq jerlerde temeki shegýge qatysty birqatar shekteýler engizildi.
